اسلام آباد،21جولائی (اے پی پی): وفاقی وزیر داخلہ محسن نقوی نے ایف آئی اے ہیڈکوارٹر اسلام آباد کا دورہ کیا، شہدا کی یادگار پر حاضری دی پھول چڑھائے اور فاتحہ خوانی کی ، ایف آئی اے کی جدید خطوط پر تنظیم نو کا فیصلہ کیا اور جامع پلان طلب کر لیا۔
وزیر داخلہ محسن نقوی نے ایف آئی اے کے شہداکی یادگار پر حاضری دی یادگار شہداء پر پھول رکھے اور فاتحہ خوانی کی۔ وزیرداخلہ محسن نقوی نے شہدا کی عظیم قربانیوں کو زبردست الفاظ میں خراج عقیدت پیش کیا۔
وزیر داخلہ محسن نقوی نے ایف آئی اے ہیڈکوارٹرز میں اعلیٰ سطح کے اجلاس کی صدارت کی ۔ اجلاس میں ایف آئی اے کی جدید خطوط پر تنظیم نو کا فیصلہ کیا گیا ، وزیرداخلہ نے ادارے کو مزید فعال بنانے کیلئے قوانین اور رولز میں ضروری ترامیم پر فوری کام کا آغاز کرنے کی ہدایت کر دی۔ وزیرداخلہ نے ایف آئی اے کے لئے فوری طور جدید ٹیکنالوجی اور مطلوبہ ہتھیاروں کی فراہمی کی بھی منظوری دی۔
وزیر داخلہ محسن نقوی نے کہا کہ ایف آئی اے کو حکومت کے ساتھ عوام کی توقعات پر پورا اترنا ہو گا، کارکردگی پر ہی ایف آئی اے کو مزید مراعات دی جائیں گی۔ محسن نقوی نے کہا کہ غیر قانونی امیگریشن میں ملوث مافیا سے آہنی ہاتھوں سے نمٹا جائے۔ وزیر داخلہ نے کہا کہ بے رحمانہ کریک ڈاؤن کیا جائے اورزیرو ٹالرنس پالیسی اپنائی جائے۔
محسن نقوی نے کہا کہ ملک کی بدنامی کے ذمہ دار عناصر کو روکنا ایف آئی اے کی اولین ذمہ داری ہے۔ محسن نقوی نے کہا کہ شہریوں کی سہولت کیلئے ائیرپورٹس پر امیگریشن عمل کو آسان اور سہل بنایا جائے، وزیر داخلہ نے ایف آئی اے کو فاسٹ ٹریک کاؤنٹر قائم کرنے کی ہدایت کی ۔ وزیرداخلہ محسن نقوی نے کی نصاب کو جدید خطوط کے مطابق بنانے کی ہدایت کی ۔
وزیر داخلہ کی سٹاف کی کمی کے پیش نظر منظور شدہ خالی آسامیوں پر فوری بھرتی کی ہدایت کی ۔وزیر داخلہ نے ہیڈکوارٹر کی عمارت کی بحالی کے لئے ماسٹر پلان طلب کرلیا۔ وزیر داخلہ محسن نقوی نے کہا کہ ایف آئی اے اکیڈمی کو نئی الاٹ کی گئی زمین پر منتقل کیا جائے، محسن نقوی نے کراچی زونل آفس کی بحالی بھی جلد از جلد کرانے کی ہدایت کی ۔ ڈی جی ایف آئی اے راجہ رفعت مختار نے وزیر داخلہ کو ادارے میں جاری اصلاحات پر بریفنگ دی ۔
وزیر مملکت داخلہ طلال چوہدری، سیکرٹری داخلہ، چئیرمین سی ڈی اے سمیت ایف آئی اے کے اعلیٰ افسران بھی اس موقع پر موجود تھے۔
