لاہور، 23 اگست (اے پی پی): نیشنل ڈیزاسٹر مینجمنٹ اتھارٹی (این ڈی ایم اے) نے ہفتہ کو غزہ کے لیے 100 ٹن وزنی امدادی سامان کی ایک اور کھیپ روانہ کی، جس کے بعد پاکستان کی جانب سے بھیجی جانے والی مجموعی انسانی ہمدردی کی امداد کا حجم بڑھ کر 1915 ٹن ہوگیا۔ یہ 19ویں امدادی کھیپ ہے، جو لاہور کے علامہ اقبال انٹرنیشنل ایئرپورٹ سے مصر کے العریش کے راستے غزہ روانہ کی گئی۔ امدادی سامان الخدمت فاؤنڈیشن کی جانب سے فراہم کیا گیا، جس میں آٹا، تیار کھانے، کوکنگ آئل، جیم اور فروٹ کاک ٹیل شامل تھے۔ یہ امدادی آپریشن وزیرِاعظم کی ہدایت پر این ڈی ایم اے کی نگرانی میں مکمل کیا گیا۔ ایئرپورٹ پر روانگی کے موقع پر ایک الوداعی تقریب بھی منعقد ہوئی، جس میں اسپیکر پنجاب اسمبلی ملک محمد احمد خان، این ڈی ایم اے اور الخدمت فاؤنڈیشن کے حکام نے شرکت کی۔
