لاہور، 29 اگست (اے پی پی): چیف سیکرٹری پنجاب زاہد اختر زمان کی زیر صدارت پی ڈی ایم اے کمیٹی روم میں اہم اجلاس منعقد ہوا، جس میں صوبائی وزراء صحت خواجہ سلمان رفیق اور خواجہ عمران نذیر نے ویڈیو لنک کے ذریعے شرکت کی۔ ریلیف کمشنر پنجاب نبیل جاوید اور ڈی جی پی ڈی ایم اے عرفان علی کاٹھیا سمیت دیگر افسران بھی شریک ہوئے۔ اجلاس میں سیلاب سے متاثرہ اضلاع میں اضافی انتظامی افسران کی تعیناتی کا فیصلہ کیا گیا، جبکہ متاثرہ علاقوں میں تعلیمی ادارے ایک ہفتے کے لیے بند رکھنے پر بھی غور کیا گیا۔ چیف سیکرٹری نے متاثرہ اضلاع میں ٹینٹ ویلیجز قائم کرنے اور وہاں تمام بنیادی و طبی سہولیات فراہم کرنے کی ہدایت کی۔ مزید برآں، سیلاب زدہ علاقوں میں کلینک آن ویلز فوری روانہ کرنے اور مویشیوں کے چارے و ویکسین کی فراہمی یقینی بنانے کی ہدایات جاری کی گئیں۔ جھنگ اور چنیوٹ کو بچانے کے لیے رواز پل کو بریچ کرنے کا فیصلہ بھی کیا گیا۔ ڈی جی پی ڈی ایم اے نے بریفنگ دیتے ہوئے بتایا کہ مون سون بارشوں کے نویں اسپیل کے دوران لاہور، گوجرانوالہ، راولپنڈی، سرگودھا، فیصل آباد، ڈیرہ غازی خان، بہاولپور، بہاولنگر اور ساہیوال میں بارشیں متوقع ہیں۔ دریائے چناب میں بڑا سیلابی ریلا جھنگ کی طرف بڑھ رہا ہے جبکہ راوی میں 2 لاکھ 17 ہزار کیوسک کا ریلا رواں دواں ہے جس کے بہاؤ میں آئندہ چند گھنٹوں میں کمی متوقع ہے۔ چیف سیکرٹری نے پی ڈی ایم اے اور انتظامی افسران کی کاوشوں کو سراہتے ہوئے کہا کہ تمام ادارے اور افسران اپنے فرائض احسن انداز میں سرانجام دے رہے ہیں۔
