شکر گڑھ،27اگست(اے پی پی): وفاقی وزیر منصوبہ بندی پروفیسر احسن اقبال نے میڈیا سے گفتگو کرتے ہوئے کہا ہے کہ وزیر اعظم پاکستان سیلاب سے متاثرہ علاقوں کا فوری دورہ کریں گے، پنجاب حکومت سیلاب متاثرین کی مدد کے لئے ہر ممکن تعاون کرے گی۔انہوں نے کہا کہ اطلاع ملی کی سیلاب کی وجہ سے کرتار پور میں لوگ محصور ہیں، کرتار پور میں 80 کے قریب افراد سیلابی پانی میں پھنسے ہوئے ہیں، کرتار پور میں پھنسے افراد کو ریسکیو کرنے کے لئے ٹیمیں متحرک ہیں، انہوں نے کہا کہ امدادی سرگرمیوں کی نگرانی کے لئے پہنچا ہوں ہر زندگی کو بچانا اہم ہے۔
وفاقی وزیر نے کہا کہ نارووال آفت زدہ ضلع ہے جہاں تاریخ کا سب سے بڑا سیلاب آیاہے۔ شکرگڑھ نارووال اور ظفروال کی ہزاروں ایکڑ اراضی زیر آب ہے۔ فلیش فلڈ نے راستے میں آنے والی سڑکوں پلوں کو تباہی سے دوچار کردیا ہے۔انہوں نے کہا کہ سیلاب کا پانی اترے گا تو تعمیر نو کا کام شروع ہوگا۔ انہوں نے مزید کہا کہ فوج معاونت کے لئے پہنچ رہی ریلیف کا کام سٹارٹ ہو چکا ہے۔تمام محکمے بشمول ڈیزاسٹر مینجمنٹ اتھارٹی ریلیف کے کاموں میں شریک ہیں۔
