لاہور 5 اگست:( اے پی پی ) محکمہ داخلہ پنجاب میں یوم استحصال کشمیر کی مناسبت سے خصوصی تقریب کا انعقاد کیا گیا۔ سیکرٹری داخلہ پنجاب ڈاکٹر احمد جاوید قاضی کی قیادت میں افسران و عملے نے اہلیان کشمیر سے یکجہتی کا اظہار کیا اور بھارت کے 5 اگست 2019 کے یک طرفہ اور غیر قانونی اقدام کی شدید مذمت کی گئی۔ اہلیان کشمیر سے اظہار یکجہتی کیلئے ایک منٹ کی خاموشی بھی اختیار کی گئی جس کے بعد کشمیر کی موجودہ صورتحال پر اظہار خیال اور اہلیان کشمیر کی امداد کیلئے پاکستان کے مضبوط عزم کا اعادہ کیا گیا۔ اس موقع پر محکمہ داخلہ پنجاب “کشمیر بنے گا پاکستان” کے نعروں سے گونج اٹھا۔ محکمہ داخلہ پنجاب کے افسران نے ہاتھوں میں پاکستان اور آزاد کشمیر کے پرچم اٹھا رکھے تھے۔ سیکرٹری داخلہ پنجاب ڈاکٹر احمد جاوید قاضی نے اپنی گفتگو میں کہا کہ جموں و کشمیر پر بھارت کے غیر قانونی قبضے کے خلاف پوری قوم متحد ہے۔ مقبوضہ جموں و کشمیر کی خصوصی آئینی حیثیت ختم کرکے کشمیریوں سے ان کے بنیادی حقوق چھینے گئے۔ انہوں نے کہا کہ مسئلہ کشمیر کا حل اقوام متحدہ کی منظور شدہ قراردادوں کے مطابق استصواب رائے میں ہے۔ یاد رہے کہ محکمہ داخلہ پنجاب کی تمام فیلڈ فارمیشنز میں بھی اہلیان جموں و کشمیر سے اظہار یکجہتی کیلئے تقاریب کا انعقاد کیا گیا۔
