ٹوکیو/لاہور 20 اگست (اے پی پی):وزیراعلیٰ پنجاب مریم نواز شریف نے ٹوکیو کے جدید ترین ٹیکنالوجی سے آراستہ ٹریفک کنٹرول مرکز کا دورہ کیا جہاں انہیں ٹریفک کنٹرول روم کے نظام، کام اور استعمال ہونے والی ٹیکنالوجی پر تفصیلی بریفنگ دی گئی۔ بریفنگ میں بتایا گیا کہ ٹوکیو کو ٹریفک کنٹرول اور مانیٹرنگ کے لئے ’انفرا ریڈ ٹیکنالوجی‘ استعمال کرنے والا دنیا کا پہلا شہر ہونے کا اعزاز حاصل ہے۔ ٹریفک کی نگرانی کے لئے سی سی ٹی وی کیمروں اور سڑک کنارے لگے سینسرز کا بھی استعمال کیا جاتا ہے۔ وزیراعلیٰ مریم نواز شریف کو ڈیٹا کلیکشن، ٹرانسپورٹ پلاننگ اور انفراسٹرکچر کے نظام سے بھی آگاہ کیا گیا۔ وزیراعلیٰ مریم نواز نے اپنی قطار میں رہنے، اوور اسپیڈنگ اور سگنل کی خلاف ورزی روکنے کے جدید نگرانی نظام کا مشاہدہ کیا۔ انہیں حادثات اور ہنگامی صورتحال میں ایمبولینس سروس اور پولیس کارروائی کے طریقہ کار سے بھی آگاہ کیا گیا۔ بریفنگ کے دوران ٹریفک کنٹرول سسٹم کے ذریعے عوام کو موسمی تبدیلی سے آگاہ کرنے کے نظام کی تفصیلات بھی فراہم کی گئیں۔ اس موقع پر وزیراعلیٰ پنجاب مریم نواز شریف نے کہا کہ جاپان کے تجربات اور جدید ٹیکنالوجی کو پنجاب میں ٹریفک اور شہری نظام کی بہتری کے لئے بروئے کار لایا جائے گا۔ انہوں نے کہا کہ لاہور کو جدید ٹریفک مینجمنٹ سسٹم کے ذریعے پہلی اسمارٹ سٹی بنایا جائے گا اور سالانہ ترقیاتی پروگرام میں اس منصوبے کے لئے فنڈز مختص کر دیے گئے ہیں۔ انہوں نے بتایا کہ لاہور سمیت پنجاب کے تمام بڑے شہروں کے ٹریفک نظام کو مصنوعی ذہانت (اے آئی) سے جوڑا جا رہا ہے جبکہ ٹریفک کی روانی برقرار رکھنے کے لئے صوبے میں 12 ہزار کلومیٹر سے زائد سڑکوں کی تعمیر و مرمت مکمل کی جا چکی ہے۔ وزیراعلیٰ نے کہا کہ ٹریفک کے دباؤ کو کم کرنے کے لئے لاہور، گوجرانوالہ اور فیصل آباد میں ماس ٹرانزٹ سسٹم متعارف کرایا جا رہا ہے جبکہ سیف سٹی کیمروں کو بھی ٹریفک مانیٹرنگ کے لئے استعمال میں لایا جا رہا ہے۔
