گلگت، 27اگست (اے پی پی): وفاقی وزیر امور کشمیر و گلگت بلتستان انجینئر امیر مقام نے دنیور منوگاہ کا دورہ کیا جہاں پر 7 رضاکار کام کرتے ہوئے مٹی کا ملبہ گرنے سے دب کر جاں بحق ہوگئے تھے۔اس موقع پر انہوں نے سیلاب سے متاثرہ علاقے میں پانی کی بحالی کے لیے جاری کام کا جائزہ لیا۔
وفاقی وزیر نے کہا کہ وفاقی حکومت پانی کی بحالی کے کام میں بھرپور تعاون کرے گی اور متاثرہ عوام کے ساتھ کھڑی ہے۔ ان کا کہنا تھا کہ وزیر اعظم شہباز شریف نے متاثرین سیلاب کی بحالی کے لیے واضح احکامات جاری کیے ہیں۔
اس موقع پر سابق وزیر اعلیٰ گلگت بلتستان حافظ حفیظ الرحمان بھی موجود تھے، جنہوں نے وفاقی وزیر کو منوگاہ نالے میں سیلاب سے ہونے والی تباہ کاریوں سے آگاہ کیا۔
