ٹوکیو، 20 اگست (اے پی پی): پاکستان اور جاپان نے تجارت، سرمایہ کاری سمیت تمام شعبوں میں باہمی تعاون بڑھانے پر اتفاق کیا ہے۔ وزیراعلیٰ پنجاب مریم نواز شریف نے جاپان کے خارجہ امور کے سینئر اسٹیٹ منسٹر مایا جی ٹاکوما سے ملاقات کی، جو جاپانی دفتر خارجہ میں منعقد ہوئی۔ وزیراعلیٰ مریم نواز شریف نے جاپان کی قیادت اور عوام کے لئے نیک تمناؤں کا اظہار کیا، جبکہ مایا جی ٹاکوما نے وزیر اعلیٰ اور ان کے وفد کا پرتپاک خیر مقدم کیا۔ انہوں نے مریم نواز شریف کو پہلی خاتون وزیراعلیٰ بننے پر مبارکباد پیش کرتے ہوئے کہا کہ جاپان کے سرکاری دورے پر آنے والی پہلی خاتون وزیراعلیٰ کے طور پر آپ کا خیر مقدم کرتے ہیں۔ مایا جی ٹاکوما نے کہا کہ تیس سال بعد آپ کے مرتبے کی پاکستانی شخصیت کا دورہ جاپان خوش آئند ہے۔ انہوں نے پنجاب میں 120 سے زائد منصوبوں کے آغاز کو قابل تحسین قرار دیا اور کہا کہ جاپان ہمیشہ پاکستان کو ایک دوست ملک کی حیثیت سے اہمیت دیتا ہے۔ مایا جی ٹاکوما نے پاکستان میں سیلاب، بالخصوص خیبرپختونخوا میں جانی نقصانات پر افسوس اور ہمدردی کا اظہار بھی کیا۔ وزیراعلیٰ مریم نواز شریف نے کہا کہ زلزلے، سیلاب اور قدرتی آفات سے نمٹنے کے لئے جاپان کے تجربات سے استفادہ کریں گے۔ انہوں نے کہا کہ جاپان معاشی، ٹیکنالوجیکل اور سماجی ترقی کا گہوارہ بن چکا ہے، جہاں مادی ترقی کے ساتھ انسانی قدروں کا احترام بھی قابل تقلید ہے۔ جاپان کی ترقی کے ماڈل کو پنجاب میں اپنانا چاہتی ہوں۔ انہوں نے مزید کہا کہ جاپان اور پاکستان آزمودہ کار دوست ہیں، اور مشکل وقت میں ساتھ دینے پر جاپان کے شکر گزار ہیں۔ وزیراعلیٰ نے کہا کہ جاپان دنیا میں ترقی اور ٹیکنالوجی کی مثال ہے جبکہ اس کی معاشرتی روایات اور اخلاقی قدریں متاثر کن ہیں۔ انہوں نے کہا کہ پاکستان میں تباہ کن زلزلے کے موقع پر جاپان کی مدد ناقابل فراموش ہے اور پنجاب زلزلے کے مقابلے کے لئے جاپانی تعمیراتی ٹیکنالوجی سے فائدہ اٹھانا چاہتا ہے۔ مریم نواز شریف نے ملاقات میں جاپانی وزیر کو اپنی حکومت کی سرمایہ کار دوست پالیسی، سہولیات اور مراعات کے بارے میں بھی آگاہ کیا۔
