لاہور، 11 ستمبر (اے پی پی): صوبائی وزیر کھیل فیصل ایوب کھوکھر سے موئے تھائی فیڈریشن اور سری لنکن قونصلیٹ کے وفد نے ملاقات کی، جس میں لاہور اسپورٹس کمپلیکس میں 10 سے 12 اکتوبر تک موئے تھائی نیشنل چیمپئن شپ منعقد کرنے کا فیصلہ کیا گیا۔ اس موقع پر فیصل ایوب کھوکھر نے کہا کہ اسپورٹس بورڈ پنجاب ایونٹ کے کامیاب انعقاد کے لیے مکمل تعاون فراہم کرے گا۔ انہوں نے مزید کہا کہ موئے تھائی (تھائی گیمز) کو آئندہ پنک گیمز میں بھی شامل کیا جائے گا۔ ان کا کہنا تھا کہ حکومت پنجاب عالمی معیار کے مطابق انتظامات یقینی بنائے گی اور پنک گیمز خواتین کھلاڑیوں کے لیے ایک فلیگ شپ ایونٹ ہے۔ یاسین جوئیہ، اعزازی قونصل جنرل سری لنکا پنجاب نے کہا کہ موئے تھائی چیمپئن شپ نوجوانوں کو صحت مند سرگرمیوں کی طرف راغب کرنے میں اہم کردار ادا کرے گی۔ ملاقات میں اسٹیڈیم کی تیاری، کھلاڑیوں کی رہائش اور سیکیورٹی اقدامات پر مشاورت کی گئی جبکہ میڈیا کوریج، عوامی آگاہی مہمات اور کمیونٹی انگیجمنٹ پر بھی اتفاق کیا گیا۔ دونوں فریقین نے ایونٹ کو کامیاب بنانے کے عزم کا اظہار کیا۔ اجلاس میں صدر موئے تھائی فیڈریشن محمد یوسف رضوی، سیکرٹری جنرل میاں ریحان، شمریز شاہد اور دیگر سینیئر عہدیداران بھی شریک تھے۔
