لاہور،03 ستمبر (اے پی پی):پاکپتن میں سیلاب متاثرین کے لئے فلڈ ریلیف کیمپ اور ٹینٹ سٹی قائم کر دیے گئے جہاں سیلاب زدگان کے قیام و طعام کے بہترین انتظامات کیے گئے ہیں۔ ریلیف کیمپ میں متاثرہ خاندانوں کے استقبال کے لئے ریڈ کارپٹ بچھائے گئے جبکہ ناشتہ، ظہرانہ اور عشائیہ بھی فراہم کیا جا رہا ہے۔
وزیراعلیٰ پنجاب کی ہدایت پر سیلاب زدہ علاقوں کے مویشیوں کے لئے مفت چارہ فراہم کیا جا رہا ہے، جس پر متاثرہ کسانوں نے اطمینان کا اظہار کیا۔ ایک بزرگ خاتون نے کہا: “ساڈے جانوراں نوں پٹھے وی دے رہے نیں، تے ساڈا وی خیال رکھدے نیں”۔ ریلیف کیمپ میں مچھر مار اور جراثیم کش ادویات کا باقاعدہ اسپرے کیا جا رہا ہے جبکہ ستھرا پنجاب ٹیمیں صفائی کے انتظامات پر مامور ہیں۔ کیمپ میں فیلڈ ہسپتال قائم ہے جہاں ڈاکٹرز اور طبی عملہ متاثرین کی خدمت میں مصروف ہیں۔ وزیراعلیٰ پنجاب مریم نواز شریف کی جانب سے سیلاب متاثرہ خاندانوں کو تحائف بھی پیش کئے گئے۔ ایک متاثرہ شخص نے بتایا کہ“ہمارا گھر سیلاب کی زد میں آگیا، ریسکیو ٹیمیں خود ہمیں ریلیف کیمپ تک لائیں”۔ کیمپ میں مقیم ایک کسان نے کہا کہ نہ صرف ہمیں کھانا مل رہا ہے بلکہ مویشیوں کے لئے چارہ بھی فراہم کیا جا رہا ہے۔ حکومت پنجاب کے اقدامات پر متاثرین نے اطمینان کا اظہار کیا۔
