راولپنڈی، 23 اکتوبر (اے پی پی) : چیف آف آرمی سٹاف ،فیلڈ مارشل سید عاصم منیر عرب جمہوریہ مصر کے سرکاری دورے پر ہیں۔اس دورے کا مقصد دونوں برادر ممالک کے درمیان فوجی تعاون اور دفاعی تعاون کو بڑھانا ہے۔
فیلڈ مارشل نے مصر کے وزیر دفاع اور دفاعی پیداوار جنرل عبدالمجید صقر اور مصری مسلح افواج کے چیف آف سٹاف لیفٹیننٹ جنرل احمد خلیفہ فتحی سے ملاقات کی۔
ملاقاتوں میں باہمی دلچسپی کے امور، علاقائی سلامتی کی صورتحال اور دوطرفہ دفاعی تعاون پر تبادلہ خیال کیا گیا۔
فیلڈ مارشل نے اس بات کا اعادہ کیا کہ مصر ایک برادر ملک ہے اور دونوں ریاستوں کے درمیان تعاون سے نہ صرف دونوں ریاستوں کے عوام کو فائدہ پہنچے گا بلکہ اس سے خطے میں امن و استحکام کے حصول میں بھی مدد ملے گی۔
وزارت دفاع کے دورے کے دوران فیلڈ مارشل کا پرتپاک استقبال کیا گیا اور انہیں گارڈ آف آنر پیش کیا گیا۔
فیلڈ مارشل نے نامعلوم فوجی کی یادگار اور مرحوم صدر محمد انور السادات کی قبر پر پھولوں کی چادر بھی چڑھائی۔
چیف آف آرمی سٹاف نے مشائخ الازہر الشریف میں الازہر کے گرینڈ امام شیخ احمد الطیب سے بھی ملاقات کی۔ امام نے امت مسلمہ کو درپیش چیلنجز پر اپنے خیالات کا اظہار کیا۔
چیف آف آرمی سٹاف نے انتہا پسندانہ نظریات اور اسلام کی متضاد تشریحات کو ختم کرنے کی ضرورت کو اجاگر کیا۔
