اسلام آباد ، 03 فروری ( اے پی پی): وفاقی وزیرِ دفاع خواجہ محمد آصف سے جمہوریہ قازقستان کے وزیرِ دفاع، لیفٹیننٹ جنرل داؤرین کوسانوف نے ملاقات کی ہے۔
ملاقات کے دوران دونوں فریقین نے پاکستان اور قازقستان کے درمیان مضبوط اور دوستانہ دوطرفہ تعلقات کا اعادہ کیا اور دفاعی تعاون میں مثبت پیش رفت پر اطمینان کا اظہار کیا۔
وفاقی وزیرِ دفاع نے مکالمے، تربیت اور ادارہ جاتی روابط کے ذریعے قازقستان کے ساتھ دفاعی اور سلامتی کے تعاون کو مزید فروغ دینے کے لیے پاکستان کے پختہ عزم کو اجاگر کیا۔
دونوں معزز شخصیات کے مابین باہمی دلچسپی کے امور، علاقائی سلامتی کی صورتحال اور دفاعی تعاون و عسکری روابط کو وسعت دینے کے امکانات پر تفصیلی تبادلۂ خیال کیا گیا۔
مہمان معزز نے علاقائی امن و استحکام کے فروغ میں پاکستان کے کردار کو سراہا اور دونوں ممالک کی مسلح افواج کے مابین تعاون میں اضافے میں گہری دلچسپی کا اظہار کیا۔
ملاقات کا اختتام باہمی اعتماد اور تعاون کے جذبے کے تحت دوطرفہ دفاعی تعلقات کو مزید مضبوط بنانے کے عزم کے ساتھ ہوا۔
