اسلام آباد،12 فروری(اے پی پی ): وفاقی وزیر برائے امورِ کشمیر، گلگت بلتستان و سیفران، انجینئر امیر مقام سے اقوامِ متحدہ کے ڈپٹی اسپیشل ریپریزنٹیٹو برائے سیکریٹری جنرل، اندریکا رتواتے کی سربراہی میں ایک وفد نے وزارت میں ملاقات کی، جس میں مہاجرین اور علاقائی تعاون سے متعلق امور پر تبادلہ خیال کیا گیا۔
ملاقات کے دوران وفاقی وزیر نے مہاجرین کی میزبانی میں پاکستان کے طویل کردار کو اجاگر کرتے ہوئے کہا کہ ملک نے “چار دہائیوں سے زائد عرصے تک افغان مہاجرین کی فراخدلی سے میزبانی کی ہے”، جو معاشی اور سیکیورٹی چیلنجز کے باوجود اس کے انسانی ہمدردی کے عزم کی عکاسی کرتا ہے۔
وفاقی وزیر نے اس بات کا اعادہ کیا کہ پاکستان بین الاقوامی اصولوں اور دوطرفہ مفاہمت کے مطابق مہاجرین کی محفوظ، باوقار، منظم اور رضاکارانہ واپسی کو یقینی بنانے کے لیے پُرعزم ہے۔
انہوں نے کہا، “پاکستان مؤثر واپسی کے انتظام کے لیے مضبوط سرحد پار رابطہ کاری اور درست اعداد و شمار کے تبادلے کی اہمیت کو تسلیم کرتا ہے۔ اندریکا رتواتے نے مہاجرین کے حوالے سے پاکستان کی دہائیوں پر محیط مہمان نوازی کو سراہا اور مہاجرین اور میزبان کمیونٹیز کی معاونت کے لیے پاکستان اور اقوامِ متحدہ کے اداروں کے درمیان جاری تعاون پر گفتگو کی۔
