اقوامِ متحدہ، 19مارچ (اے پی پی): اقوامِ متحدہ کی سلامتی کونسل میں شام کی صورتحال پر بریفنگ کے دوران پاکستان نے اس بات پر زور دیا کہ شام میں استحکام کی کوششوں کو جاری رکھا جائے تاکہ ملک بتدریج بحالی کی جانب بڑھ سکے۔
اقوامِ متحدہ میں پاکستان کے مستقل مندوب، سفیر عاصم افتخار احمد نے کہا کہ شامی قیادت میں جاری سیاسی عمل کو جامع اور بروقت انداز میں آگے بڑھانا اہم ہے۔ انہوں نے اس بات کی نشاندہی کی کہ ادارہ جاتی ڈھانچے کی مضبوطی طویل مدتی استحکام کے لیے مددگار ثابت ہو سکتی ہے۔انہوں نے پارلیمانی عمل کی تکمیل کی امید ظاہر کی اور اقوامِ متحدہ کے تعمیری کردار کے لیے حمایت کا اعادہ کیا۔
سفیر عاصم افتخار احمد نے شامی فریقین کے درمیان حالیہ رابطوں کو مثبت پیش رفت قرار دیتے ہوئے کہا کہ اس عمل کو آگے بڑھانے کے لیے مسلسل مکالمہ اور باہمی اعتماد ضروری ہے۔ انہوں نے مزید کہا کہ حالیہ انتظامی اقدامات حوصلہ افزا ہیں۔
سیکیورٹی کے حوالے سے انہوں نے کہا کہ استحکام کے عمل کو مؤثر بنانے کے لیے مربوط اقدامات کی ضرورت ہے، جن میں سرحدی نظم و نسق اور انسدادِ دہشت گردی کی کوششیں شامل ہیں۔
معاشی صورتحال پر بات کرتے ہوئے انہوں نے کہا کہ کچھ بہتری کے باوجود حالات اب بھی چیلنجز کا شکار ہیں، تاہم مختلف شعبوں میں سرگرمیوں کے لیے مواقع موجود ہیں جنہیں مؤثر انداز میں استعمال کیا جا سکتا ہے۔انسانی صورتحال کے حوالے سے انہوں نے کہا کہ بہت سے افراد کو اب بھی معاونت کی ضرورت ہے، اور بنیادی سہولیات اور بحالی کے اقدامات کے لیے مزید وسائل درکار ہیں۔
انہوں نے علاقائی سالمیت کے حوالے سے پاکستان کے مؤقف کا اعادہ کرتے ہوئے کہا کہ متعلقہ بین الاقوامی معاہدوں اور قراردادوں کا احترام ضروری ہے۔
سفیر عاصم نے کہا کہ شام کو درپیش چیلنجز کے ساتھ ساتھ بہتری کے امکانات بھی موجود ہیں، اور اس سلسلے میں بین الاقوامی تعاون اہم کردار ادا کر سکتا ہے۔انہوں نے مزید کہا کہ پاکستان خطے میں کشیدگی میں کمی اور مسائل کے پُرامن حل کے لیے کوششوں کی حمایت جاری رکھے گا۔
