اسلام آباد، 06 اپریل (اے پی پی ): وزیراعظم کے معاونِ خصوصی برائے صنعت و پیداوار، ہارون اختر خان نے صوبائی وزیر زراعت و لائیو اسٹاک پنجاب، سید عاشق حسین شاہ سے ملاقات کی، جس میں زرعی اور لائیو اسٹاک شعبوں کی ترقی اور وفاق و صوبوں کے درمیان ہم آہنگی کے فروغ پر تبادلہ خیال کیا گیا۔
اجلاس میں وفاقی سیکرٹری صنعت و پیداوار سیف انجم، پنجاب کے صوبائی سیکرٹریز برائے زراعت و لائیو اسٹاک، اور انجینئرنگ ڈویلپمنٹ بورڈ کے سی ای او نے شرکت کی۔
ملاقات کے دوران پنجاب میں زراعت اور لائیو اسٹاک کے شعبوں میں جاری اقدامات، ان کے نتائج اور مستقبل کی حکمت عملیوں پر تفصیلی گفتگو کی گئی تاکہ معیشت کے ان اہم شعبوں کو مزید مستحکم کیا جا سکے۔
ہارون اختر خان نے کہا کہ وزیراعظم شہباز شریف کی ہدایات کے مطابق حکومت زراعت اور لائیو اسٹاک کے شعبوں کو بااختیار بنانے کے لیے پرعزم ہے تاکہ برآمدات میں اضافہ اور معاشی ترقی کو فروغ دیا جا سکے۔ انہوں نے بتایا کہ ایک جامع میٹ پالیسی تیار کی گئی ہے جو گوشت کی برآمدات میں اضافے اور قومی معیشت کو مضبوط بنانے میں مدد دے گی۔
انہوں نے مزید کہا کہ وزارتِ صنعت و پیداوار تمام اسٹیک ہولڈرز سے مشاورت کے بعد قومی ٹریکٹر پالیسی متعارف کرائے گی۔ اس پالیسی میں زرعی میکانائزیشن، ہارویسٹنگ کے جدید حل اور مقامی سطح پر ٹریکٹر سازی کے فروغ پر خصوصی توجہ دی جائے گی۔ انہوں نے اس بات پر زور دیا کہ زراعت میں مشینری کے استعمال کو فروغ دینا وقت کی اہم ضرورت ہے اور ہارویسٹرز کی مقامی تیاری کے لیے بھی الگ پالیسی تشکیل دی جائے گی۔
معاونِ خصوصی نے وزیراعلیٰ پنجاب کی جانب سے زراعت اور لائیو اسٹاک کے فروغ کے لیے کیے گئے اقدامات کو سراہتے ہوئے کہا کہ ان کے مثبت نتائج سامنے آ رہے ہیں۔ انہوں نے اس بات کا اعادہ کیا کہ زراعت اور لائیو اسٹاک موجودہ حکومت کی اولین ترجیحات میں شامل ہیں۔
صوبائی وزیر سید عاشق حسین شاہ نے بتایا کہ پنجاب میں تقریباً 3 لاکھ مویشی برآمد کے لیے دستیاب ہیں جو ٹریس ایبل اور ویکسینیٹڈ ہیں۔ انہوں نے مزید کہا کہ صوبے میں 30 ہزار ٹریکٹرز پہلے ہی فراہم کیے جا چکے ہیں جبکہ مزید 20 ہزار جلد فراہم کیے جائیں گے۔
ہارون اختر خان نے یقین دہانی کرائی کہ وفاقی حکومت گوشت کی برآمدات کے فروغ اور عالمی منڈیوں سے روابط مضبوط بنانے کے لیے صوبوں کو مکمل تعاون فراہم کرے گی۔ انہوں نے یہ بھی اعلان کیا کہ کمرشل اتاشیوں اور متعلقہ اسٹیک ہولڈرز کا اجلاس آئندہ ہفتے پنجاب حکومت کے ساتھ مل کر منعقد کیا جائے گا تاکہ برآمدات میں سہولت کو مزید بہتر بنایا جا سکے۔
معاونِ خصوصی نے اس بات پر زور دیا کہ وفاق اور صوبوں کے درمیان مؤثر رابطہ اور مشاورت ہی پالیسیوں کے کامیاب نفاذ اور زراعت و لائیو اسٹاک کے شعبوں میں پائیدار ترقی کی ضمانت ہے۔
