اسلام آباد، 21 مئی (اے پی پی ): حکومتِ پاکستان اور جرمن حکومت کے درمیان 40.5 ملین یورو مالیت کے تکنیکی تعاون کے ایک معاہدے پر دستخط ہوگئے۔ اس معاہدے کا مقصد موسمیاتی تبدیلی، سماجی تحفظ اور قابلِ تجدید توانائی سمیت اہم شعبوں میں دوطرفہ ترقیاتی تعاون کو مزید مضبوط بنانا ہے۔ معاہدے کے تحت جرمن ترقیاتی بینک (کے ایف ڈبلیو) پاکستان میں 9 نئے ترقیاتی منصوبوں کے آغاز کے لیے مالی اور تکنیکی معاونت فراہم کرے گا۔
معاہدے پر سیکریٹری اقتصادی امور، محمد حمیر کریم، اور پاکستان میں جرمنی کی سفیر اینا لیپل نے دستخط کیے۔ اس موقع پر وزارتِ اقتصادی امور کے اعلیٰ حکام اور جرمن سفارت خانے کے نمائندگان بھی موجود تھے۔
تقریب سے خطاب کرتے ہوئے سیکریٹری اقتصادی امور محمد حمیر کریم نے پاکستان کی سماجی و اقتصادی ترقی کے لیے جرمن حکومت اور کے ایف ڈبلیو کی مسلسل معاونت کو سراہا۔ انہوں نے کہا کہ پاکستان اور جرمنی کے درمیان 1961 سے باہمی اعتماد اور تعاون پر مبنی مضبوط اور دیرپا ترقیاتی شراکت داری قائم ہے۔ انہوں نے مزید کہا کہ جرمنی پاکستان کے اہم ترقیاتی شراکت داروں میں شامل ہے، جبکہ موجودہ فعال دوطرفہ ترقیاتی پورٹ فولیو تقریباً 550 ملین یورو تک پہنچ چکا ہے۔
پاکستان میں جرمنی کی سفیر اینا لیپل نے کہا کہ جرمنی پاکستان کے ساتھ اپنی دیرینہ شراکت داری کو نہایت اہمیت دیتا ہے اور پائیدار اور جامع ترقی کے فروغ کے لیے اقدامات کی حمایت جاری رکھنے کے لیے پُرعزم ہے۔ انہوں نے کہا کہ یہ نیا معاہدہ دونوں ممالک کے اس مشترکہ عزم کی عکاسی کرتا ہے کہ موسمیاتی تبدیلی، توانائی کی منتقلی اور سماجی کمزوری جیسے عالمی چیلنجز سے عملی تعاون اور مشترکہ اقدامات کے ذریعے نمٹا جائے۔ سفیر نے اس اعتماد کا اظہار کیا کہ معاہدے کے تحت شروع کیے جانے والے منصوبے پاکستان بھر کی کمیونٹیز کے لیے بامعنی فوائد فراہم کریں گے اور دونوں ممالک کے مضبوط تعلقات کو مزید مستحکم بنائیں گے۔
