اقوام متحدہ، 17 جولائی ( اے پی پی): وزیراعظم یوتھ پروگرام کے چیئرمین، رانا مشہود احمد خان نے پائیدار، جامع اور موسمیاتی تبدیلی سے ہم آہنگ شہروں کی تعمیر کے لیے پاکستان کے عزم کا اعادہ کیا۔
اقوام متحدہ کی جنرل اسمبلی میں نیو اربن ایجنڈا کے وسط مدتی جائزہ اجلاس سے خطاب کرتے ہوئے رانا مشہود احمد خان نے کہا کہ یہ جائزہ عالمی برادری کے لیے اس بات کا اہم موقع ہے کہ وہ پیش رفت کا جائزہ لے اور نیو اربن ایجنڈا پر عمل درآمد کے عزم کی تجدید کرے، بالخصوص ایسے وقت میں جب تیز رفتار شہری آبادی میں اضافہ رہائش، ٹرانسپورٹ، شہری تحفظ اور ماحولیات پر بڑھتے ہوئے دباؤ کا باعث بن رہا ہے۔
انہوں نے ان چیلنجز سے نمٹنے کے لیے پاکستان کی جانب سے اٹھائے گئے عملی اقدامات پر روشنی ڈالی۔ 2025 میں آنے والے تباہ کن شہری اور دریائی سیلابوں کا حوالہ دیتے ہوئے، جن میں ملک بھر میں ایک ہزار سے زائد افراد جاں بحق ہوئے، انہوں نے کہا کہ پاکستان اقوام متحدہ کے ادارے یو این ہیبی ٹیٹ کے تعاون سے ایک قومی شہری حکمتِ عملی (National Urban Strategy) تشکیل دے رہا ہے تاکہ موسمیاتی لچک (Climate Resilience) کو ابتدا ہی سے شہری منصوبہ بندی کا لازمی حصہ بنایا جا سکے۔
چیئرمین وزیراعظم یوتھ پروگرام نے کہا کہ سیلاب کے بعد بحالی کے قومی پروگرام کے تحت اب تک بے گھر ہونے والے خاندانوں کے لیے چار لاکھ سے زائد گھر تعمیر کیے جا چکے ہیں، جبکہ مضبوط تعمیراتی معیار اور موسمیاتی لچک کو مستقبل کے رہائشی منصوبوں کا بنیادی جزو بنایا جا رہا ہے۔
انہوں نے مزید بتایا کہ حکومت کم لاگت اور کم کاربن اخراج والی پبلک ٹرانسپورٹ کے فروغ، بے نظیر انکم سپورٹ پروگرام (BISP) کے ذریعے سماجی تحفظ کو مزید مستحکم بنانے—جو اس وقت ملک بھر میں نو ملین سے زائد خاندانوں کو سہولت فراہم کر رہا ہے—اور سیف سٹی منصوبوں کے دائرہ کار کو وسعت دے کر جدید نگرانی کے نظام اور مربوط کمانڈ اینڈ کنٹرول مراکز کے قیام کے ذریعے شہریوں کے تحفظ کو یقینی بنانے کے لیے بھی اقدامات کر رہی ہے۔
رانا مشہود احمد خان نے اس بات پر زور دیا کہ پاکستان کا مستقبل اس کے نوجوانوں سے وابستہ ہے، جو ملک کی تقریباً 67 فیصد آبادی پر مشتمل ہیں۔ انہوں نے کہا کہ جیسے جیسے نوجوان روزگار اور بہتر مواقع کی تلاش میں شہروں کا رخ کر رہے ہیں، انہیں معیاری تعلیم، ہنر مندی، روزگار اور کاروباری مواقع فراہم کرنا ناگزیر ہے تاکہ شہری آبادی میں اضافہ خوشحالی اور ترقی کا ذریعہ بن سکے۔
انہوں نے اس تناظر میں “پُرعزم پاکستان” پروگرام کا بھی ذکر کیا، جو وزیراعظم محمد شہباز شریف کی قیادت میں وزیراعظم یوتھ پروگرام کا ایک اہم اقدام ہے۔ اس پروگرام کا مقصد قومی اور بین الاقوامی شراکت داروں کے تعاون سے نوجوانوں کو ہنر مندی، روزگار، کاروباری مواقع اور خود روزگاری کے لیے مؤثر راستے فراہم کرنا ہے۔
اپنے خطاب کے اختتام پر چیئرمین وزیراعظم یوتھ پروگرام نے عالمی تعاون کے لیے پاکستان کے عزم کا اعادہ کرتے ہوئے کہا کہ پاکستان شہری ترقی اور تیز رفتار شہری آبادی میں اضافے سے نمٹنے کے اپنے تجربات دیگر رکن ممالک کے ساتھ شیئر کرنے اور پائیدار شہری ترقی کے لیے عملی اور عوام دوست حل تلاش کرنے میں بھرپور تعاون کے لیے تیار ہے۔ انہوں نے امید ظاہر کی کہ نیو اربن ایجنڈا کا یہ وسط مدتی جائزہ موجودہ اور آنے والی نسلوں کے لیے مثبت اور ٹھوس نتائج کا باعث بنے گا۔
