اسلام آباد، 22 اکتوبر (اے پی پی): مالدیپ کی خاتونِ اوّل ساجدہ محمد نے ڈرگ ریگولیٹری اتھارٹی آف پاکستان (ڈریپ) کا دورہ کیا، جس میں عوامی صحت کے تحفظ اور محفوظ و معیاری ادویات تک رسائی یقینی بنانے کے لیے ضابطہ جاتی تعاون کی اہمیت کو اجاگر کیا گیا۔
دورے کے دوران مالدیپ کی خاتونِ اوّل نے ڈریپ کی قیادت اور پیشہ ورانہ خدمات انجام دینے والے عملے کی عوامی صحت کے تحفظ اور ادویات کے معیار کو برقرار رکھنے کے لیے کاوشوں کو سراہا۔
انہوں نے پاکستان اور مالدیپ کے درمیان صحت کے شعبے میں تعاون کو مزید مضبوط بنانے کے حوالے سے امید کا اظہار کیا، بالخصوص ادویات کے ضابطہ جاتی امور اور عوامی صحت کے ان شعبوں میں جو دونوں ممالک کے لیے مشترکہ دلچسپی کے حامل ہیں۔
اس دورے سے دونوں ممالک کے درمیان ادویات کے تحفظ کو فروغ دینے، ضابطہ جاتی طریقۂ کار کو بہتر بنانے اور صحت کے نظام کو مزید مستحکم کرنے کے لیے تعاون کے نئے مواقع اجاگر ہوئے۔
