اسلام آباد، 30 اکتوبر (اے پی پی): وزیراعظم محمد شہباز شریف سے سنگاپور کے وزیر خارجہ ڈاکٹر ویوین بالاکرشنن نے جمعہ کو یہاں ملاقات کی۔ ملاقات میں دوطرفہ تجارت اور سرمایہ کاری بڑھانے سمیت ترجیحی شعبوں میں تعاون کو وسعت دینے کے طریقوں پر تبادلہ خیال کیا گیا۔
وزیراعظم نے سنگاپور کے ساتھ دیرینہ اور دوستانہ تعلقات کو مزید مستحکم کرنے کے پاکستان کے عزم کا اعادہ کیا۔ رواں سال دونوں ممالک سفارتی تعلقات کے قیام کی 60 ویں سالگرہ منا رہے ہیں۔
وزیراعظم نے سنگاپور کی شاندار اقتصادی تبدیلی، جدت اور ترقی کے شعبوں میں کامیابیوں کو سراہتے ہوئے کہا کہ پاکستان دوطرفہ سطح پر اور آسیان کے پلیٹ فارم کے ذریعے سنگاپور کے ساتھ شراکت داری کو اہمیت دیتا ہے۔
فریقین نے ڈیجیٹل معیشت، فن ٹیک، بنیادی ڈھانچے کی ترقی، لاجسٹکس، چھوٹے اور درمیانے درجے کے کاروبار اور خدمات کے شعبوں میں تعاون بڑھانے پر تبادلہ خیال کیا۔ انہوں نے باہمی طور پر مفید اقتصادی تعاون کی نئی راہیں تلاش کرنے اور عوامی روابط بڑھانے پر بھی گفتگو کی۔
دونوں رہنماؤں نے علاقائی اور بین الاقوامی پیش رفت پر خیالات کا تبادلہ کیا اور دوطرفہ و کثیرالجہتی فورمز پر تعاون جاری رکھنے کے عزم کا اعادہ کیا۔
