اسلام آباد،05اگست(اے پی پی ):معاون خصوصی اطلاعات و نشریات ڈاکٹر فردوس عاشق اعوان نے کہا ہے کہ مودی سرکار کے اقدام سے بھارت کے جعلی سیکولرازم کا نقاب ہٹ گیا ہے،بھارت کا مقبوضہ کشمیر سے متعلق یکطرفہ فیصلہ سلامتی کونسل کی قراردادوں کی کھلی خلاف ورزی ہے۔کشمیری عوام تحریک جدوجہد میں عظیم قربانیاں دے رہے ہیں، پاکستانی قوم تحریک آزادی کے شہداء کو سلام پیش کرتی ہے۔
پارلیمنٹ ہاؤس کے باہر میڈیا سے گفتگو کر تے ہوئے انہوں نے کہا کہ کشمیری عوام انسانی حقوق کی تنظیموں اور عالمی طاقتوں کو مدد کیلئے پکار رہے ہیں۔کشمیر ہماری رگوں میں خون کی طرح دوڑتا ہے، پاکستان کشمیری عوام کی سیاسی،سفارتی اور اخلاقی مدد جاری رکھے گا۔
معاون خصوصی نے کہا کہ ہم مسئلہ کشمیر کو ہر عالمی فورم پر اجاگر کرتے رہیں گے، بھارتی اقدام علاقائی امن پر منفی اثرات مرتب کریگا۔ بھارت نے آرڈیننس کے ذریعے کشمیریوں کو یرغمال بنانے کا بھونڈا اقدام اٹھایا، انہوں نے کہا کہ بھارت نے مکروہ عمل کرکے خطے کا امن داؤ پر لگایا اور خطے کی ترقی کا دشمن بن کر سامنے آیا۔ کشمیر کاز کو طاقت سے کچلنے کی کوشش خطے کے امن کو داؤ پر لگاسکتی ہے،ہندوستان کسی صورت خطے کی ترقی اور امن کی سوچ نہیں رکھتا۔
فردوس عاشق اعوان نے کہا کہ پارلیمنٹ کے اندر اور باہر کی سیاسی قیادت کو کشمیریوں کی حمایت پر خراج تحسین پیش کرتی ہوں۔کشمیریوں کیساتھ نا انصافی کو اجاگر کرنے پر میڈیا کے شکر گزار ہیں، بھارتی اقدام کے بعد پاکستان تمام آپشنز زکا جائزہ لے رہا ہے۔
انہوں نے مزید کہا کہ وزیراعظم عمران خان خطے کے امن اور ترقی کیلئے کام کررہے ہیں، بھارتی اقدام کو ان کی اپنی کٹھ پتلی انتظامیہ مسترد کرچکی ہے، امریکی صدر کے بیان کے بعد مودی سرکار بوکھلاہٹ کی شکار ہے۔
اے پی پی /ناہید/حامد
