اسلام آباد، 02نومبر(اے پی پی ):وزیراعظم کی معاون خصوصی برائے اطلاعات و نشریات ڈاکٹر فردوس عاشق اعوان نے مولانا فضل رحمان کو مخاطب کرتے ہوئے کہا ہے کہ مولانا صاحب عوام اب مکمل طور پر بیدار ہوچکے ہیں ماضی میں وہ کرپٹ سیاستدانوں کے کرتوت دیکھ چکے ہیں اور آپ ہمیشہ اپنے ذاتی مفادات کے لیے ان کرپٹ حکمرانوں کو تحفظ دیتے رہے ہیں۔
سماجی رابطہ کی ویب سائٹ پر اپنے پیغام میں ڈاکٹر فردوس عاشق اعوان نے کہا کہ قوم اب کسی صورت مولانا کو مذہب کارڈ استعمال نہیں کرنے دے گی، وہ دینی مدارس کے معصوم طلباء کو سڑکوں پر لاکر کر انتشار کی دھمکیاں دے رہے ہیں جبکہ دارالخلافہ میں کھڑے ہوکر قومی اداروں پر پر زبان درازی کررہے ہیں۔
ڈاکٹر فردوس عاشق اعوان نے کہا کہ مولانا صاحب قومی اداروں پر تو دشمن حملہ آور ہوتے ہیں آپ کا کیا ایجنڈاہے؟ سیاسی بونے ایک ایک کرکے محض اس لیے اچھل کود میں مصروف ہے کہ خود کو احتسابی شکنجے سے بچا لیں۔ انہوں نے کہا کہ انہیں فقط ذاتی مفادات عزیز ہے ملک و قوم اور عوام کا نہ تو انہیں پہلے خیال تھا نہ اب ہے اور نہ ہی یہ کبھی ملکی مفاد کا سوچ سکتے ہیں۔
ڈاکٹر فردوس عاشق اعوان نے مزید کہا کہ وزیراعظم عمران خان نہ تو ان کے ساتھ ڈیل کرنے کو تیار ہے اور نہ ہی انہیں ڈھیل دینے کو۔
سورس: وی این ایس، اسلام آباد
