سکھر۔ 18مارچ(اے پی پی): تفتان بارڈر سے مزید 757 زائرین کو سکھر قرنطینہ سینٹر پہنچادیا گیا، قرنطینہ سینٹر میں زائرین کی تعداد 1050 ہوگئی، سیکیورٹی کے انتظامات مزید سخت، پولیس و رینجرز کی نفری بڑھا دی گئی،کرونا وائرس کے خدشے کے پیش نظر تفتان بارڈر پر موجود مزید 757 زائرین کو 18 کوچز کے ذریعے سکھر کے قرنطینہ سینٹر پہنچا دیا گیا ہے زائرین کو سخت سیکورٹی میں تفتان بارڈر سے سکھر لایا گیا جنہیں فوری طور پر قرنطینہ سینٹر منتقل کردیا گیا ہے ۔
زائرین میں خواتین اور بچے بھی شامل ہیں زائرین کو قرنطینہ سینٹر پہنچانے کے بعد وہاں پر سیکیورٹی کے انتظامات مزید سخت کردیئے گئے ہیں اور وہاں پر پولیس اور رینجرز کی تعداد میں بھی اضافہ کردیا گیا ہے اور صحت عملے اور ڈاکٹرز کی تعداد میں بھی اضافہ کردیا گیا ہے ان زائرین کی آمد سے قبل ہی 293 زائرین پہلے ہی قرنطینہ سینٹر میں موجود تھے اور اب مزید 757 زائرین کے آنے سے وہاں پر زائرین کی تعداد 1050 سے زائد ہوگئی ہے جبکہ 293 زائرین جن کو 14 مارچ کو سکھر لایا گیا تھا کے ٹیسٹ میں سے 143 زائرین میں کرونا وائرس کی موجودگی کی تصدیق ہوگئی ہے جبکہ 147 زائرین کو نارمل قرار دیا گیا ہے جس کی تصدیق سندھ حکومت کے ترجمان مرتضیٰ وہاب نے بھی کی ہے دوسری جانب آج لائے گئے 757 زائرین کے کوائف درج کرنے کا سلسلہ شروع کردیا گیا ہے اور ان کے بھی بلڈ و دیگر ٹیسٹس لیے جائیں گے۔
وی این ایس، سکھر
