لاہور ، 30 مارچ(اے پی پی): چیف سیکرٹری پنجاب میجر (ر) اعظم سلیمان خان نے ہدایت کی ہے کہ تبلیغی اجتماع کے شرکا ء کو انہی اضلاع میں رکھا جائے جہاں وہ موجود ہیں جبکہ تبلیغی اجتماع کے تمام ملکی و غیر ملکی شرکاء کی سکرینگ بھی کی جائے، سکریننگ کے بعد جن افرادمیں کرونا وائرس کی علامات پائی جائیں انکو قرنطینہ میں رکھا جائے۔
پیر کو یہاں کورونا وائرس کی ٹیسٹنگ، لاک ڈاؤن کے باعث تعلیمی نقصان کے ازالے اور انتظامی امور کے جائزے کیلئے چیف سیکرٹری پنجاب میجر (ر) اعظم سلیمان خان کی زیر صدارت اجلاس منعقد ہوا۔اجلاں میں سینئر ممبر بورڈ آف ریونیو نے بریفنگ میں بتایا کہ تمام اضلاع میں ہسپتالوں کیلئے پرسنل پروٹیکشن ایکوپمنٹ (PPE) بھجوا دیا گیا ہے،بھجوائے گئے سامان میں 38500سرجیکل ماسک،5750 95 -ماسک، 14600گاؤن، 36500دستانے اور 12900 گاگلز شامل ہیں۔
چیف سیکرٹری نے کہا کہ ہر ضلع کی ڈیمانڈ کے مطابق پرسنل پروٹیکشن ایکوپمنٹ کی فراہمی بلا تعطل جاری رہے گی۔پہلی سے آٹھویں جماعت کے طلباء کو امتحانات کے بغیرچھٹیوں کے کام میں کارکردگی کی بنیاد پر اگلی کلاس میں ترقی دینے کی تجویز پر غور بھی کیا گیا۔پہلی سے آٹھویں جماعت کے طلباء کیلئے سائنس اور ریاضی کے مضامین کی آن لائن کلاسوں کا فیصلہ کیا گیا جبکہ جماعت نہم اور دہم کے تمام مضامین کے آن لائن لیکچرز کا فیصلہ بھی کیا گیا، یہ لیکچرز کیبل ٹی وی پر بھی نشر کئے جائیں گے۔
اے پی پی /لاہور /قرۃالعین
