اسلام آباد ، 3 جون (اے پی پی): وفاقی وزیر اطلاعات و نشریات سینیٹر شبلی فراز نے پی ٹی آئی نظریاتی لوگوں کی جماعت ہے جو موروثی سیاست پر یقین نہیں رکھتی۔ حکومت نے ایس او پیز متعارف کرانے کے بعد مرحلہ وار اور محدود پیمانے پر معاشی سرگرمیوں کا آغاز کیا، ایس او پیز کو نظر انداز کیا گیا تو لاک ڈاؤن کو سخت کردیں گے۔
بدھ کو وفاقی پارلیمانی سیکرٹری برائے ریلوے فرخ حبیب کے ہمراہ میڈیا کو بریفنگ دیتے ہوئے شبلی فراز کا کہنا تھا کہ کورونا سے انتقال کرنے والے صوبائی اور قومی اسمبلی کے ارکان کی وفات پر افسوس ہے۔ کورونا وبا ء کا پاکستان میں تیزی سے اضافہ ہونے لگا ہے، حکومت کورونا وبا کا مسلسل جائزہ لے رہی ہے۔ لاک ڈاؤن کی حکمت عملی کو مدنظر رکھتے ہوئے حکومت غریب طبقے کے بارے میں بھی سوچتی ہے۔ انہوں نے کہاکہ کورونا وباء سے بچنے کیلئے احتیاطی تدابیر پر عمل کرنا ضروری ہے۔ انہوں نے عوام سے اپیل کی کہ عوام کورونا وبا کے ایس او پیز پر سختی سے عمل کریں۔
ٹڈی دل کے حوالے سے وفاقی وزیر نے بتایا کہ ٹڈی دل کے خاتمے کیلئے عوام اور حکومتی ادارے مل کر کام کررہے ہیں،امیدہے کہ ٹڈی دل کے خاتمے کیلئے کامیابی سے ہمکنارہوں گے۔ انہوں نے بتایا کہ اپوزیشن لیڈر میاں شہباز شریف کے خلاف واضح ثبوت موجود ہیں۔ ان کا نام ایگزیٹ کنٹرول لسٹ (ای سی ایل) میں ڈالنے کا معاملہ زیر غور ہے، بیرون ملک نہیں جانے دیا جائے گااور نہ ہی احتساب کا عمل رکے گا۔
اس موقع پر فرخ حبیب نے کہا کہ ملک کو لوٹنے والوں کے چہروں سے احتساب کا خوف عیاں ہے،پہلی بار عمران خان کی صورت میں ایسا وزیراعظم آیا جس کا اپنا یا خاندان کا کوئی کارروبار نہیں۔
وفاقی وزیر نے مزید کہا کہ وزیراعظم عمران خان آئے ہی احتساب کے نصب العین کے ساتھ ہیں اور اسی وجہ سے چینی بحران پر مشتمل کمیشن رپورٹ عوام کے سامنے پیش کی تاکہ ملک کو نقصان پہنچانے والوں کے خلاف بلا امیتاز کارروائی ہو سکے۔
