پشاور،27 جولائی (اے پی پی): وفاقی وزیر اسد عمر نے کہا ہے کہ کورونا وبا کے کورونا وبا کے پھیلاؤ کو روکنے کے لئے خیبر پختونخوا حکومت کے اقدامات لائق تحسین ہیں۔اس حوالے سے خیبر پختوخوا کو بہت زیادہ چیلنجز درپیش تھے لیکن وزیر اعلی محمود خان نے کورونا سے متعلق تمام امور کی خود نگرانی کی اور کرونا کو کنٹرول کرنے پر کافی حد تک کامیابی پائی ہے ۔
ان خیالات کا اظہار وفاقی وزیر اسد عمر نے آج پشاور میں وزیر اعلی محمود خان اور وزیر صحت تیمور جھگڑا کیساتھ مشترکہ پریس کانفرنس میں کیا۔
اسد عمر نے کہا کہ کورونا کے سلسلے میں وزیر صحت تیمور سلیم جھگڑا اور چیف سیکریٹری نے فرنٹ لائن پر کام کیا ہے اور یہی وجہ ہے کہ صوبائی حکومت کے موثر اور بروقت اقدامات کی وجہ سے صوبے میں کورونا کیسز میں واضح کمی آئی ہے لیکن وبا کا خطرہ ابھی بدستور موجود ہے اس لیے احتیاط بہت ضروری ہے۔انہوں نے عوام سے اپیل کرتے ہوئے کہا کہ عید الاضحٰی سادگی سے منائیں، حکومت جو بھی اقدامات اٹھا رہی ہے وہ عوام کی جانوں کو محفوظ کرنے کے لئے ہیں۔
اس موقع پر وزیر اعلی محمود خان نے کہا کہ عید الاضحٰی کے موقع پر وبا پھیلنے کے خدشات ہیں عوام احتیاط کریں، عید سادگی سے اور اپنے گھروں پر منائیں۔انہوں نے کہا کہ اس عید پر کورونا سے شہید ہونے والوں کو خصوصی طور پر یاد کیا جائے اور ایس او پیز پر عملدرآمد کو یقینی بنایا جائے۔
وزیر اعلی نے کہا کہ میں نے خود بھی عید سادگی سے منانے کا فیصلہ کیا ہے اور اپنے کابینہ ممبران کو بھی عید سادگی سے منانے کی ہدایت کی ہے۔ انہوں نے شہریوں کو سیاحتی مقامات کیطرف رخ کرنے سے گریز کی ہدایت کی اور کہا کہ عید کے بعد سیاحتی مقامات کو کھولنے کے لئے این سی سی کے اجلاس میں مشاورت کی جائے گی۔
وی این ایس،پشاور
