لاہور،9ستمبر(اے پی پی): وزیراعلیٰ پنجاب سردار عثمان بزدار نے کہا ہے کہ عوام کے جان و مال کا تحفظ پولیس کی بنیادی ذمہ داری اور اولین فرض ہے۔
بدھ کو یہاں پنجاب کے نئے انسپکٹر جنرل پولیس انعام غنی سے ملاقات کے دوران انہوں نے صوبے میں امن و امان کی صورتحال کو مزید بہتر بنانے کے حوالے سے ہدایات دیں۔انہوں نے کہا کہ پولیس کو عوام کی توقعات پر پورا اترنا ہوگا، پولیس کو مکمل طور پر غیر جانبدار بنانا ہے۔ پولیس کو امن عامہ کی فضا کو بہتر سے بہتر بنانے کیلئے مزید جانفشانی سے فرائض سرانجام دینا ہوں گے۔
عثمان بزدار نے ہدایات جاری کر تے ہوئے کہا کہ جرائم پیشہ عناصر کے خلاف بلاامتیاز کارروائی کی جائے، کوئی دباؤ قبول نہ کیا جائے جبکہ میرٹ اور قانون کی بالادستی کو ہر صورت یقینی بنائیں۔
وزیر اعلی پنجاب نے کہا کہ تھانوں میں عام آدمی کی دادرسی کیلئے پولیس کو فعال انداز میں کام کرنا ہے۔
وزیر اعلی پنجاب نے نئے تعینات ہونے والے انسپکٹر جنرل پولیس انعام غنی کیلئے نیک خواہشات کا اظہار کرتے ہوئے کہا کہ امید ہے کہ آپ نئے پاکستان میں نئی پولیس کو پروان چڑھائیں گے جس پر انسپکٹر جنرل پولیس انعام غنی نے کہا کہ پولیس کے نظام میں بہتری کیلئے ہر ممکن اقدام اٹھائیں گے، ہر کام میرٹ اور انصاف کے تقاضوں کو مدنظر رکھ کر کیا جائے گا۔
