صوابی ،21 ستمبر (اے پی پی ): ضلع بھر میں انسداد پولیو مہم فل پروف سیکیورٹی کے ساتھ شروع ہو گئی ہے ، جو 25ستمبر تک جاری رہے گی۔ڈی پی او صوابی از خود علاقے کی نگرانی کر رہے ہیں، ضلع بھر میں1054 پولیو ٹیموں کے ساتھ 1249پولیس سیکیورٹی اہلکار تعینات کیے گئے ہیں ۔
ضلع بھر میں دفعہ 144 کے تحت ڈبل سواری پر پابندی عائد کی گئی ہے ۔ ڈی پی او صوابی نے انسداد پولیو مہم کی موثر نگرانی کے لئے ضلع بھر کے داخلی و خارجی ایریا میں انچارجان کی نگرانی میں 120 اہلکاروں کی تعنیاتی کی ہے جبکہ حساس یوسیز میں 837 پولیس کمانڈوز کے ساتھ ساتھ سادہ لباس اہلکاروں کو بھی تعینات کیا گیا ہے ۔
ڈی پی او صوابی کی خصوصی ہدایت پر پولیو ٹیموں کو فراہم کی گئی ہر علاقے کی سیکیورٹی کی نگرانی براہ راست ایس ڈی پی اوزخود کر رہے ہیں۔
ڈسٹرکٹ پولیس آفیسر صوابی نے پولیس افسران کوحکم دیتے ہوئے کہا کہ ضلع میں امن وامان کے قیام کو ممکن بنانے کے لیے اپنا بھر پور کردار ادا کرتے ہوئے عوام میں پولیس کا بہترین امیج اُجاگر کریں۔
