لاہور 6 نومبر(اے پی پی):صوبائی وزیر جیل خانہ جات فیاض الحسن چوہان نے جمعہ کو یہاں جیل ریفارمز کے حوالے سے اعلیٰ سطحی اجلاس ہو ا۔اجلاس میں وزیر جیل خانہ جات کو قیدیوں کی بہتری اور جیل اصلاحات پر تفصیلی بریفنگ دی گئی۔فیاض الحسن چوہان نے اسیران کی فلاح و بہبود کے لیے مجوزہ قوانین میں ترامیم کے حوالے سے سفارشات طلب کر لیں۔
اس موقع پر صوبائی وزیر نے کہا کہ پیرول قوانین کو زیادہ سے زیادہ قیدیوں کے لیے کارآمد بنانے کے حوالے سے کام کا آغاز کر دیا گیا ہے، محکمہ جیل خانہ جات کو “نفرت انسان سے نہیں جرم سے ہے” کے اصول پر آگے لے کر چلیں گے، انسانیت اور اسلام کے اصولوں کے مطابق قیدیوں کو معاشرے کے کارآمد رکن بنانے پر کام کریں گے۔
انہوں نے مزید کہا کہ کسی بھی جیل میں قیدیوں کے ساتھ غیر انسانی سلوک پر سخت کارروائی کی جائے گی، وزیر اعظم عمران خان کے جذبہ انسانی ہمدردی کے تحت قیدیوں اور ان کے خاندانوں کی ویلفیئر پر خصوصی توجہ دی جائے گی۔
