لاہور،6 نومبر(اے پی پی):وزیراعلیٰ پنجاب سردار عثمان بزدار نے کہا ہے کہ وزیراعظم عمران خان جیسا شفاف اور ایماندار لیڈرپاکستان کی بقا کے لئے ناگزیر ہے، وزیراعظم عمران خان کے ہوتے ہوئے کوئی پاکستان کی طرف میلی آنکھ سے نہیں دیکھ سکتا۔ وزیراعظم عمران خان 22 کروڑ عوام کے دل کی آواز ہیں۔
جمعہ کو یہاں وزیراعظم کے معاون خصوصی برائے یوتھ افیئرز عثمان ڈار سے ملاقات کے دوران باہمی دلچسپی اور سیاسی امور پر بھی تبادلہ خیال کرتے ہوئے وزیراعلیٰ پنجاب کا کہنا تھا کہ وزیراعظم عمران خان کے ویژن کے مطابق نوجوانوں کو با اختیار بنایا ہے۔نوجوانوں پر سرمایہ کاری پاکستان کے مستقبل کو روشن بنائے گی۔
ملاقات کی جانب سے اپوزیشن جماعتوں کی جانب سے اداروں کے خلاف بیان بازی کی مذمت کی گئی ۔ وزیر ا علیٰ نے کہا کہ ماضی میں کسی حکومت نے نوجوانوں پر اتنی بڑی سرمایہ کاری نہیں کی جتنی تحریک انصاف کے مختصر دور میں ہوئی ہے۔ کامیاب جوان پروگرام سے روزگار میں اضافہ اورغربت میں کمی آئے گی۔ ٹائیگرز فورس کے نو جوان عوام کی خدمت کیلئے میدان عمل میں مصروف ہیں۔
وزیر اعلی پنجاب نے کہا کہ ٹائیگر زفورس کے نو جوان خدمت کے جذبے سے سرشار ہیں ، اداروں کے خلاف باتیں کرنے والوں کو پہلے بھی ناکامی کا سامنا کرنا پڑا ہے اور آئندہ بھی یہ عناصر ناکام رہیں گے،اپوزیشن کے پاس کوئی پروگرام ہے نہ ایجنڈا۔ انہوں نے کہا کہ یہ پاکستان کو کمزور کرنے کی مذموم کوششوں میں مصروف ہیں۔ انہوں نے مزید کہا کہ اپوزیشن جو مرضی کر لے، لوٹ مار کا حساب دینا ہی پڑے گا۔ پاکستان کو آگے لے جانے کیلئے چوروں اور لٹیروں کا احتساب ضروری ہے۔
ملاقات میں گفتگو کے دوران عثمان ڈار نے کہا کہ کامیاب نوجوان پروگرام کامیابی سے جاری ہے،ٹائیگرز فورس ہر میدان میں عوام کی خدمت کے لئے آگے آگے ہے،اپوزیشن کا غیر فطری اتحاد بہت جلد منطقی انجام کو پہنچ جائے گا-
اے پی پی /لاہور/قرۃالعین
