لاہور۔27جنوری (اے پی پی )قومی شاہرات پرموٹرسائیکل سوار سب سے زیادہ حادثات کا شکار ہوتے ہیں، موٹرسائیکل سواروں کے حادثات کی وجوہات پر کام کرنا موٹروے پولیس کی ہمیشہ سے اولین ترجیح رہی ہے۔ان خیالات کا اظہار کمانڈنٹ نیشنل ہائی ویز اینڈ موٹروے پولیس ٹریننگ کالج ڈی آئی جی محبوب اسلم نے بد ھ کے روز اٹلس ہنڈا کے تعاون سے ہیلمٹ، عقبی شیشوں، فرنٹ اینڈ بیک لائٹس اور سائیڈ انڈیکیٹرز کی افادیت سے متعلق لاہور میں روڈ سیفٹی مہم کے انعقاد پر کیا۔اٹلس ہنڈا کی طرف سے جنرل مینجرآفٹرسیلز محمد ظفر اقبال، نیشنل مینجر سیفٹی محمد قمربشیر، ریجنل مینجر سیفٹی عثمان افضل، موٹروے پولیس کے دیگر افسران اورمقامی معززین کی کشیر تعداد اس موقع پر موجود تھی۔روڈ سیفٹی مہم کا آغاز کرتے ہوئے ڈی آئی جی محبوب اسلم نے کہا کہ پاکستان میں ہر سال ہزاروں لوگ ٹریفک حادثات میں جان گنوا بیٹھتے ہیں،ورلڈ ہیلتھ آرگنائزیشن کے مطابق عالمی سطح پر ہونے والے حادثات کا شکار ہونے والوں میں موٹرسائیکل سوار اٹھائیس فیصدہیں جو کہ ایک بہت بڑی تعداد ہے،موٹرسائیکل سوارں کے حادثات کی سب سے بڑی وجہ موٹرسائیکلوں کی لائٹس کا خراب ہونا اور بیک ویو شیشوں کواستعمال نہ کرنا ہے، ہیڈ اور بیک لائٹس نہ ہونے سے رات کے وقت موٹرسائیکل سوار نمایاں نظرنہیں آتے، موٹرسائیکل سوار سائیڈ شیشے نہ ہونے کی وجہ سے سوار پیچھے آنے والی ٹریفک کے بہاو کو بھی دیکھ نہیں پاتے۔ محبوب اسلم نے کہا کہ موٹرسائیکل کے حادثات میں سر کی چوٹ موت، مستقل معذوری اور شدید زخم کا باعث بنتی ہے،سر کی چوٹ سے معیاری ہیلمٹ کے استعمال، ٹریفک قوانین کی پابندی اور روڈ سیفٹی کے اصولوں پر کاربند ہو کر ہی بچا جا سکتا ہے۔مہم کے دوران پر موٹرسائیکل سواروں میں مفت ہیلمٹ تقسیم کئے گئے، سا ئیڈ انڈیکیٹر اور ٹیل لائٹس لگائی گئیں، موٹرسائیکلوں پر عقبی شیشے نصب کیے گئے جبکہ موٹرسائیکل سواروں کو سفرکے دوران احتیاطی تدابیر کے متعلق آگاہ بھی کیا گیا۔مہم کے دوران اس بات پر خصوصی زور دیا گیا کہ ہیلمٹ نہ صرف موٹر سائیکل چلانے والے بلکہ پیچھے بیٹھے شخص کے لئے بھی انتہائی اہم ہے۔موٹرسائیکل سواروں کو یہ بھی بتایا گیا کہ موٹرسائیکل پر پیچھے دیکھنے والے شیشے مت اتاریں،آہستہ رفتار کو اپناتے ہوئے روڈکے انتہائی بائیں جانب رہیں، موبائل فون کے استعمال اور ٹرپل سواری سے پرہیز کریں۔
