اسلام آباد۔29مارچ (اے پی پی):توانائی کے شعبے میں تعاون بڑھانے کیلئے پاک ۔ڈنمارک کا مشترکہ اجلاس پیر کو وزیر توانائی عمر ایوب خان اور ڈینش سفیر کی صدارت میں ہوا۔ اجلاس میں ڈنمارک کی انرجی ٹیکنیکل ٹیم نے پاکستان میں قابل تجدید توانائی کے شعبے میں تعاون بڑھانے پر رپورٹ پیش کی ۔ رپورٹ کی روشنی میں پاک ڈنمارک کا مشترکہ ورکنگ گروپ تشکیل دیا گیا۔ وزارتِ توانائی کے اعلامیہ کے مطابق وفاقی وزیر توانائی عمر ایوب خان نے کہا کہ ڈنمارک کی طرف سے توانائی کے شعبے میں جی ٹو جی تعاون کے اقدام کو سراہتے ہیں، چاہتے ہیں کہ ڈنمارک مقامی سطح پر ونڈ ٹربائن اور سولر پینل کی مینوفیکچرنگ میں تعاون کرے۔ انہوں نے کہا کہ ہماری حکومت توانائی کے شعبہ کی ترقی کے لئے نمایاں کام کر رہی ہے، پاکستان کی توانائی مارکیٹ کو وسعت دے رہے ہیں۔ انہوں نے کہا کہ حکومت بجلی کی کم لاگت پیداوار اور ٹرانسمیشن سسٹم پر کام کر رہی ہے۔ ڈنمارک کے سفیر نے کہا کہ ڈنمارک پاکستان کے ساتھ برابری کی بنیاد پر پارٹنر شپ کا خواہاں ہے۔ انہوں نے کہا کہ ڈنمارک مشترکہ ورکنگ گروپ کے ذریعے پالیسی اور آپریشنل سطح پر تجربے کا تبادلہ کیا جائے گا۔
