ہنزہ، 02 اپریل ( اےپی پی): وزیر داخلہ شیخ رشید احمد نے ہنزہ کے تاریخی طور پر مشہورالتت فورٹ کا دورہ کیا۔ اس موقع پر ہنزہ میں قائم روایتی موسیقی کے اسکول کے بچوں نے روایتی موسیقی پیش کی۔
وزیر داخلہ شیخ رشید احمد نے میڈیا سے بات کرتے ہوئے کہا گلگت بلتستان صوبہ بننے جارہا ہے ۔یہ بہت خوبصورت جگہ ہے، سیاحت کیلئے بہت دلکش ہے ، افسوس کہ اس پر ہم نے توجہ نہیں دی۔ اگر اس علاقے کو پروموٹ کیا جائے تو پاکستان کی سب سے خوبصورت جگہ یہ ہے اور ان شااللہ گلگت بلتستان کا ایک رول ہوگا۔ قومی اسمبلی میں اور سینٹ میں اور وزیر اعظم عمران خان کی گورنمنٹ میں گلگت بلتستان بہت ترقی کریگا۔
ایک سوال کے جواب میں وزیر داخلہ کا کہنا تھا کہ سی پیک کے سلسلے میں دیامر بھاشا ڈیم پر چائنیز نے کام شروع کیا ہے اس سے علاقے میں روزگار کے مواقعے بھی پیدا ہونگے اور علاقے میں ترقی ہوگی ۔ چائنیز سیاحوں کے آمد کے حوالے سے بات کرتے ہوئے وزیر داخلہ کا کہنا تھا کہ ہم نے ویزے کی سسٹم کو آن لائن کیا ہے اور جو بھی چائنیز یہاں آنا چاہے ہم انکو ویزہ دینگے، پاک چائنہ بارڈر کے حوالے سے بات کرتے ہوئے وزیر داخلہ کا کہنا تھا کہ کووڈ کی وجہ سے چائنیز حکومت نے کافی پابندیاں لگائی ہیں اور انشااللہ پاک چائنہ بارڈر بہت جلد کھل جائے گا۔
