سکھر،15اپریل ( اے پی پی ): نیب سکھر نے مختلف کیسز میں پلی بارگین کے ذریعے وصول کی گئی 6 کروڑ21 لاکھ 10 ہزار 888 روپے کا چیک سندھ حکومت کے محکمہ خزانہ کے نمائندہ کے حوالے کردیا۔
نیب سکھر کی جانب سے جاری کردہ اعلامیہ کے مطابق ایک تقریب میں ڈائریکٹر جنرل نیب سکھر مرزا محمد عرفان بیگ نے 6 کروڑ21 لاکھ10 ہزار 888 روپے کا چیک محکمہ خزانہ سکھر کے نمائندے کے حوالے کیا۔ یہ رقم ایجوکیشن ورکس، لوکل گورنمنٹ، خزانہ اور محکمہ فوڈ کے مختلف کیسوں میں پلی بار گین کے ذریعے وصول کی گئی تھی۔
ڈائریکٹر جنرل نیب سکھر مرزا محمد عرفان بیگ نے افسران کی کاوشوں کو سراہتے ہوئے امید ظاہر کی کہ نیب افسران اسی جذبے کے ساتھ کام جاری رکھیں گے۔ انہوں نے کہا کہ چیئرمین نیب جسٹس (ر) جاوید اقبال کے ویژن کے مطابق ہمارا عہد کرپشن سے پاک پاکستان کے تحت کام جاری ہے۔
مرزا محمد عرفان بیگ نے کہا کہ نیب بدعنوانی کے خاتمے کے لیے اپنے عزم میں اٹل ہے اور مستقبل میں مزید بہتر نتائج حاصل ہونگے۔ انہوں نے کہا کہ نیب سکھر قوم کی امیدوں پر پورا اترنے کے لیے بلا خوف خطر کام کر رہی ہے۔
تقریب میں تحقیقاتی افسران اور سینئر افسران بھی موجود تھے۔
