اسلام آبا، 19اپریل (اے پی پی):وزیر اعظم عمران خان سے معروف روسی تاجروں کے وفد نے پیر کو یہاں ملاقات کی۔چیئرمین بورڈ آف ڈائریکٹرز ٹی ایم کے اور سینارا گروپ کےصدر دمتری پمپیا نسکی کی قیادت میں روسی وفد کے دیگر ارکان میں میخائل پاپوف ، الیگزینڈر پمپیوئنسکی ، آندرے پرخومچک ، ولادیمر شیچر باتوخ ، انتون زوبیخن ، ایوگنئی پوپلاوسکی ، میکسم پاولوف اور انیساتا بیرخانوفا شامل تھے جبکہ اس موقع پر حماد اظہر ، شوکت فیاض ترین ، عبدالرزاق داؤد ، ذوالفقار عباس بخاری ، تابش گوہر ، عاطف بخاری اور دیگر پاکستانی اعلی حکام بھی موجود تھے۔
ملاقات کے دوران روس اور پاکستان کے درمیان بڑے پیمانے پر مینوفیکچرنگ ، ریلوے اور توانائی کے شعبے میں باہمی تعاون بڑھانے پر تفصیلی تبادلہ خیال کیا گیا۔ فریقین نے پہلے سے ہی جاری منصوبوں میں تیزی لانے پر اتفاق کیا۔
وزیر اعظم عمران خان نے غیر ملکی براہ راست سرمایہ کاری راغب کرنے کیلئے سرمایہ کاروں کو ساز گارماحول فراہم کرنے کے حوالے سے موجودہ حکومت کے عزم کا اعادہ کیا۔ وفد نے پاکستان میں مختلف منصوبوں میں سرمایہ کاری میں گہری دلچسپی کا اظہار کیا۔
