دارالحکومت میں منشیات فروشوں کے خاتمہ تک وفاقی پولیس چین سے نہیں بیٹھے گی،ڈی آئی جی   اور ایس ایس پی آپریشنز اسلام آباد کی پریس کانفرنس

اسلام آباد۔26اپریل  (اے پی پی):ڈی آئی جی آپریشنز اسلام آباد افضال احمد کوثر اور ایس ایس پی آپریشنز اسلام آباد ڈاکٹر سید مصطفی تنویر نے کہا ہے کہ دارالحکومت میں منشیات فروشوں کے خاتمہ تک وفاقی پولیس چین سے نہیں بیٹھے گی، ڈورے اور اٹھال گاؤں میں بڑے آپریشن کئے گئے 6 منشیات فروشوں کو گرفتار کرکے چار کلو آٹھ سو گرام ہیروئن اور 22 کلو 110 گرام چرس 70 گرام آئس اور بڑی مقدار میں ناجائز اسلحہ برآمد کر ليا گيا ہے ۔ وہ پیر کو پولیس لائن ہیڈ کوارٹرز میں مشترکہ پریس کانفرنس میں صحافیوں کو تفصیلات سے آگاہ کر رہے تھے۔ اس موقع پر ڈی آئی جی افضال کوثر  اور ایس ایس پی ڈاکٹر مصطفی تنویر نے کہا کہ وفاقی دارالحکومت میں منشیات ڈیلرز اور منشیات فروشوں خصوصا تعلیمی اداروں میں منشیات کا مکروہ دھندہ کرنے والے جرائم پیشہ عناصر کے خلاف بڑا کریک ڈاؤن شروع کر رکھا ہے۔ اس سلسلہ میں منشیات فروشوں کے خلاف سپیشل سکواڈز تشکیل دئیے گئے ہیں، جنہوں نےگزشتہ رات اور آج صبح اسلام آباد پولیس نے ڈورے اور اٹھال گاؤں میں منشیات فروشوں کے خلاف آپریشن کئے ۔ ڈورے گاؤں آپریشن کے دوران 06 بڑے منشیات فروشوں کو گرفتار کیا گیا،3730گرام ہیروئن،1110گرام چرس برآمد کی گئی۔جبکہ اٹھال گاؤں آپریشن کے دوران 12ملزمان گرفتار کرکے 22 کلوگرام چرس، 01 کلوگرام ہیروئن،70 گرام آئس، 01پسٹلز، 1شارٹ گن اور ایمونیشن برآمد کیا ۔ انہوں نے کہا کہ رواں ماہ تعلیمی اداروں سمیت منشیات فروشوں کے خلاف بھرپور کارروائیاں کی گئیں اور رواں ماہ کے دوران تعلیمی اداروں میں منشیات فروشوں کے خلاف کریک ڈاؤن جاری رکھا۔انہوں نے کہا کہ گزشتہ دنوں میں 09 نائجیرین باشندوں سمیت کل 55 منشیات فروشوں کو گرفتار کیا گیا انہوں نے کہا کہ ان منشیات فروشوں کے قبضے سے 32783گرام چرس، 40022گرام ہیروئن، 16گرام کوکین،60گرام آئس270نشہ آور گولیاں، 388بوتلیں شراب برآمد کی گئی ۔ افضال احمد کوثر نے ایک سوال کے جواب میں کہا کہ اسلام آباد پولیس نے منشیات فروشوں کے خلاف خصوصی مہم شروع کر رکھی ہے ۔ انہوں نے کہا کہ ان شااللہ مستقبل قریب میں وفاقی دارالحکومت کو منشیات سے پاک کردیا جائے گا ۔ ایس ایس پی مصطفى تنویرنے کہا کہ خشیات فروشوں کے صفایا تک وفاقی پولیس چین سے نہیں بیٹھے گی ۔ایک سوال جواب میں اُنہوں نے کہا کہ منشیات فروشوں کے خلاف بلا خوف  وبلا امتیاز کارروائیاں جاری رہیں گی ۔ تعلیمی اداداروں میں منشیات فراہم کرنے والے درندے کسی رعایت کے مستحق نہیں۔