لاہور 1 مئی(اے پی پی): وزیراعلیٰ پنجاب سردار عثمان بزدار نے لیبر ڈے کے حوالے سے اجلاس کی صدارت کی۔ اجلاس میں
سیکرٹری محنت نے ورکرز کی فلاح وبہبود کیلئے کیے گئے اقدامات کے بارے میں بریفنگ دی۔ وزیراعلیٰ پنجاب سردار عثمان بزدار نے یوم مئی پر ورکرز کی کم از کم اجرت20ہزار روپے کرنے کا اعلان کر دیا۔
وزیر اعلیٰ عثمان بزدار نے کہا کہ محنت کش کی فلاح وبہبود سب سے زیادہ مقدم ہے، پنجاب واحد صوبہ ہے جہاں ورکرز کی کم از کم اجرت20ہزار روپے کرنے کی منظوری دی ہے، تحریک انصاف کی حکومت نے 3برس میں ورکرز کی کم از کم اجرت میں پانچ ہزار روپے کا اضافہ کیا ہے، سابق دور میں ورکرز کی فلاح وبہبود پر کوئی توجہ نہیں دی گئی اور نہ ہی ماضی کی حکومت نے محنت کشوں کو ریلیف دینے کیلئے کوئی ٹھوس اقدام نہیں اٹھایا، سابق حکمرانوں نے5 سالہ دور میں ورکرز کی کم از کم اجرت میں صرف تین ہزار روپے کا اضافہ کیا، ہماری حکومت ورکرز کی کم از کم اجرت میں آئندہ بھی اضافہ کرے گی، وزیراعظم عمران خان کی قیادت میں فرسودہ نظام ختم کر کے آن لائن لیبر انسپکشن اور سوشل سکیورٹی کنٹری بیوشن کی شفاف اورباسہولت ادائیگی کیلئے ”سیلف اسسمنٹ سکیم“ کا اجراء کیاگیاہے۔
انہوں نے کہا کہ سوشل سکیورٹی ہسپتالوں میں عوام کیلئے مفت ایمرجنسی طبی سہولیات کی فراہمی یقینی بنائی گئی ہے، سوشل سکیورٹی انسپکشن20فیصد تک محدودکی گئی ہے، ورکرز کیلئے میرج گرانٹ ایک لاکھ سے بڑھا کر2 لاکھ جبکہ ڈیتھ گرانٹ 5 لاکھ سے بڑھا کر6 لاکھ کردی گئی ہے، محنت کشوں کے بچوں کیلئے تعلیمی وظائف کا آن لائن اورشفاف نظام متعارف کرایاگیاہے۔
