کوہلو،02مئی(اے پی پی): لیویز فورس نے بڑی کارروائی کرتے ہوئے تخریب کاری کا بڑا منصوبہ ناکام بنا دیا۔کارروائی کے دوران تحصیل کاہان کے علاقے سوراف نالہ میں تخریب کاروں کے ٹھکانے سے بڑی تعداد میں اسلحہ و گولا بارود برآمد کر لیا گیا۔برآمد اسلحہ و گولا بارود میں ایم جی تھری گن1عدد ،سکیل روند 500 عدد ، مارٹر گن 1عدد ،مارٹر روند1عدد، بی ایم 12 میزائل روند 25عدد ،آر پی جی 7 روند 15عدد شامل ہیں۔
اتوار کو یہاں لیویز لائن کوہلو میں ڈپٹی کمشنر عمران ابرہیم بنگلزئی نے پریس بریفنگ میں بتایا کہ لیویز کیو آر ایف نے حساس اداروں کی اطلاع پر 9 گھنٹے کے طویل سرچ آپریشن کے بعد تخریب کاروں کے عزائم ناکام بنا دیئے اور تحصیل کاہان کے علاقے سوراف نالہ میں دہشتگردوں کے ٹھکانے پر کارروائی کرکے بڑی تعداد میں بھارتی ساختہ اسلحہ و گولا بارود برآمد کر لیا گیا۔انہوں نے کہا کہ دہشتگرد اسلحہ و گولا بارود ضلع میں بڑی تخریبی کارروائی میں استعمال کرنا چاہتے تھے۔
ڈپٹی کمشنر عمران ابرہیم بنگلزئی نے کہا کہ لیویز فورس سمیت تمام سیکورٹی فورسز نے دہشتگردوں کے خلاف کامیاب کارروائیاں کر کے اور قربانیاں دے کر ضلع میں امن وامان کو برقرار رکھا ہے، دہشتگردوں کے مذموم مقاصد کو ہماری سیکورٹی فورسز کبھی کامیاب نہیں ہونے دیں گے۔انہوں نے کہا کہ لیویز فورس نے ہمیشہ جانفشانی اور دلیری سے کٹھن حالات کا مقابلہ کیا، خطے سے دہشتگردی کو جڑ سے اکھاڑنے کے لئے لیویز فورس کی کاروائیاں جاری رہیں گی۔
ڈپٹی کمشنر نے کامیاب کارروائی پر لیویز فورس کے جوانوں کے لئے ایک لاکھ روپے نقد انعام کا اعلان بھی کیا۔
