پشاور، 3مئی(اے پی پی): ڈی پی او ایبٹ آباد ظہور بابر آفریدی نے کہا ہے کہ عید الفطر کے موقع پر لاک ڈاون کے باعث ایبٹ آباد کے تمام سیاحتی مقامات بند رہیں گے، اسکے علاوہ ہوٹل سرائے اور ریسٹ ہاوسز بھی لاک ڈاؤن کیوجہ سے بند ہونگے۔
ڈی پی او نے اپنے ایک وڈیو بیان میں کہا کہ عید تعطیلات کے موقع پر مکمل ڈاؤن ہوگا اور ٹرانسپورٹ ، دوکانیں ، ٹک شاپس بند ہونے کی وجہ سے مشکل پیش آ سکتی ہے، لہذا سیاحوں سے گزارش ہے گلیات ، نتھیاگلی، ٹھنڈیانی ، شملہ ، ہرنو، سجیکوٹ اور دیگر سیاحتی علاقوں کا رخ نہ کریں۔
ڈی پی او ایبٹ آباد نے کہا کہ ایبٹ آباد کے تمام داخلی راستوں ، دونوں انٹرچینجز سمیت 14 مقامات پر پولیس چیک پوائینٹس قائم کی گئی ہیں جہاں بھاری تعداد میں پولیس کے جوان تعینات کیے جائیں گے ۔
