لاہور،13مئی(اے پی پی): وزیراعلیٰ پنجاب سردار عثمان بزدار نے عید الفطر کی نماز بارش کے باعث وزیراعلیٰ آفس کی مسجد میں ادا کی، انہوں نے سماجی فاصلہ برقرار رکھتے ہوئے لوگوں کو عید کی مبارکباد دی اور ملک کی ترقی، خوشحالی،استحکام اور قیام امن کیلئے دعا کی۔
وزیراعلیٰ عثمان بزدار نے کورونا اورغزہ میں اسرائیلی بمباری اورمیزائل حملوں کے شہداء کے ایصال ثواب کیلئے بھی دعا مانگی اور وطن عزیز میں قیام امن کیلئے اپنی جانوں کا نذرانہ پیش کرنیوالے شہداء کے درجات کی بلندی کیلئے بھی دعا کی۔
وزیر اعلیٰ نے کہا کہ ہم شہداء کے لواحقین کے ساتھ مکمل اظہار یکجہتی کرتے ہیں، ہمیں آج شہداء کے اہل خانہ کو بھی یاد رکھنا ہے، دعا ہے کہ پاکستان ترقی اورخوشحالی کی منزل حاصل کرے۔انہوں نے کہا کہ کورونا سے جاں بحق ہونے والے افراد کے لواحقین کے ساتھ ہیں اور دلی ہمدردی رکھتے ہیں۔
عثمان بزدار نے کہا کہ فلسطین میں اسرائیلی حملوں میں شہیدنہتے فلسطینیوں کے اہل خانہ سے یکجہتی کا اظہار کرتے ہیں اور بھارتی مظالم کا سامنا کرنے والے کشمیری عوام کی جدوجہد کو سلام پیش کرتے ہیں۔
اے پی پی/ افتخار/نورین
