بورے والا، 24 مئی (اے پی پی): تھانہ صدر پولیس بورے والا نے دوران ڈکیتی وکیل کے اندھے قتل میں ملوث خطرناک ملزم عدیل اور صحافی کے 16 سالہ بیٹے کے قتل کے نامزد ملزمان کو گرفتار کرلیا، وکیل کے قتل میں ملوث ملزم ڈکیتی اور راہزنی کی متعدد وارداتوں میں بھی ملوث رہا ہے اسکا سہولت کار بھی گرفتار کرلیا گیا۔ ڈی ایس پی بورے والا حاجی محمد اشرف تبسم نے اپنے دفتر میں پریس کانفرنس کے دوران انکشاف کیا ایک ماہ قبل مقامی بار کے رکن چوہدری عرفان نذیر کو دوران ڈکیتی قتل کر کے سندھ کچے کے علاقے میں فرار ہونے والا خطرناک ملزم عدیل کو تھانہ صدر پولیس نے جدید ٹیکنالوجی استعمال کرتے ہوئے گذشتہ روز اسکے ایک سہولت کار سمیت گرفتار کرلیا ملزم ڈکیتی اور راہزنی کی متعدد وارداتوں میں بھی ملوث ہے جبکہ تھانہ ماڈل ٹاون پولیس نے مقامی صحافی کے 16 سالہ بیٹے کو معمولی رنجش پر فائرنگ کر کے قتل کرنے والے دو نامزد ملزمان کو بھی گرفتار کرلیا گیا ہے۔ ڈی ایس پی کے مطابق دوران ڈکیتی بے گناہ وکیل کے قاتل اور 16 سالہ نوجوان کے قاتلوں کو پولیس انکے کیفر کردار تک پہنچائے گی۔
