لاہور، 26مئی(اے پی پی): وزیر اعلیٰ پنجاب سردار عثمان بزدار نے کہا کہ انصاف صحت کارڈ غریب طبقہ کیلئے نعمت ہے آج پاکستان کی تاریخ کا ایک اہم ترین دن ہے،پنجاب میں ہر شہری کو مفت علاج کی سہولت فراہم کرنے کے تاریخی پروگرام کا آغاز ہونے جارہاہے۔
وزیر اعلیٰ پنجاب سردار عثمان بزدار سے اراکین اسمبلی نے سرکٹ ہاؤس لیہ میں بدھ کے روزہ ملاقات کی۔ ملاقات میں انہوں نے کہا کہ یونیورسل ہیلتھ کوریج پروگرام کا آغاز لیہ سے کررہے ہیں،دسمبر تک پنجاب کے ہر شہری کو ہیلتھ کوریج کا ہدف مقرر کیا ہے۔
اراکین اسمبلی نے یونیورسل ہیلتھ کوریج کے آغاز پر وزیراعلیٰ عثمان بزدار کو مبارکباد دی۔منتخب نمائندوں نے وزیراعلیٰ کو اپنے حلقوں کے مسائل سے آگاہ کیا،وزیراعلیٰ عثمان بزدار نے مسائل ترجیحی بنیادوں پر حل کرنے کی یقین دہانی کروائی۔
وزیر اعلی پنجاب نے کہا کہ اراکین اسمبلی میرے ساتھی ہیں،ان کے جائز کام ہر صورت ہوں گے،کسی کو جائز کاموں کی راہ میں رکاوٹ نہیں ڈالنے دوں گا،ترقی کا سفر لیہ جیسے دوردراز علاقے تک پہنچایاہے،لیہ میں اربوں روپے کاترقیاتی پیکیج دیا جارہاہے،ماضی میں لیہ کو نظر انداز کر کے علاقے کے لوگوں کی محرومیوں میں اضافہ کیاگیا۔
عثمان بزدار نے کہا کہ سابق دور میں لیہ کے عوام کوخالی نعروں سے بہلایا گیا،تحریک انصا ف کی حکومت لیہ کے عوام کو ان کا حق واپس کررہی ہے۔انہوں نے کہا کہ محروم علاقوں کی ترقی پر وسائل خرچ کرتے رہیں گے۔
ملاقات کرنے والے اراکین قومی اسمبلی میں عبدالمجید خان نیازی، ملک نیاز احمد جھکڑ،صوبائی وزیر توانائی پنجاب ڈاکٹر اختر ملک،معاون خصوصی برائے اطلاعات ڈاکٹر فردوس عاشق اعوان،اراکین صوبائی اسمبلی ملک احمد علی اولکھ،محمد طاہر رندھاوا،سردار شہاب الدین،سید رفاقت علی اور دیگر اس موجود تھے۔
