سیا لکوٹ ،27 مئی (اے پی پی ): ترجمان ریسکیو1122کے مطابق بانی ڈائریکٹر جنرل پنجاب ایمرجنسی سروس ڈاکٹر رضوان نصیر کی خصوصی ہدایت اور ڈپٹی کمشنر سیالکوٹ طاہر فاروق کی زیر نگرانی ریسکیو1122نے ڈسٹرکٹ ایمرجنسی آفیسر انجینئر نوید قبال کی سربراہی میں خواجہ صفدر روڈ نالہ بھیڑ کے کنارے اربن سیلاب سے بچاؤ کی فرضی مشقوں میں ضلعی انتظامیہ کے ساتھ مل کر حصہ لیا۔ ریجنل ایمرجنسی آفیسر ریسکیو1122 گوجرانوالہ سید کمال عابد، ایڈیشنل ڈپٹی کمشنر ریونیو میر محمد نواز اور اسسٹنٹ کمشنر سونیاصدف نے سیلابی صورت حال کی فرضی مشقوں کا جائزہ لیا۔ اس موقع پر ریجنل ایمرجنسی آفیسر سید کمال عابد نے کہا کہ اس طرح کی فرضی مشقوں کا مقصد ریسکیورز کی پیشہ وارانہ صلاحیتوں کو پرکھنے کے ساتھ ساتھ آلات کی آپریشنل صلا حیتوں کو بھی جانچنا ہے تاکہ ممکنہ سیلاب سے بچاؤ کے لیے بہتر ین اقدامات کیے جا سکیں اور ضلعی محکموں کے درمیان باہمی اشتراک قائم کیا جا سکے۔ فرضی مشقوں میں ریسکیو1122کے ہمراہ 32ریسکیو محافظین اور ضلع کے دوسرے اداروں جن میں سول ڈیفنس، واسا، میو نسپل کارپوریشن، محکمہ ہیلتھ، محکمہ انہار،محکمہ لائیو اسٹاک، ٹریفک پولیس، سوشل ویلفیئر آرگنائزیشن، اور روزویلفیئر نے بھی حصہ لیا۔ اس موقع پر اے ڈی سی آر میر محمد نواز نے ریسکیو اور دیگر اداروں کی ممکنہ سیلاب کی تیاری و باہمی تعاون کے حوالے سے اطمینان کا اظہار کیا۔
