لاہور، 01جون (اے پی پی ): صوبائی وزیر تعلیم پنجاب ڈاکٹر مراد راس نے کہا ہے کہ وزیر اعظم عمران خان کے ڈیجیٹل پاکستان کے ویژن کے عین مطابق محکمہ تعلیم پنجاب کو مکمل طور پر ڈیجٹلائیز کیا جا رہا ہے، اساتذہ کی مکمل اور بھرپور توجہ مخض ہمارے بچوں کو بہتر سے بہتر تعلیم فراہم کرنے پر مرکوز ہونی چاہیے ۔
ان خیالات کا اظہار صوبائی وزیر تعلیم پنجاب ڈاکٹر مراد راس نے اساتذہ کی زندگی ڈیجیٹلائیزیشن کے ذریعے مزید آسان بنانے کے حوالے سے اجلاس کی صدارت کرتے ہوئے کیا۔ اجلاس میں سیکرٹری سکول ایجوکیشن، نمائندہ پی آئی ٹی بی اور متعلقہ حکام نے شرکت کی ۔
اجلاس میں گفتگو کرتے ہوئےڈاکٹر مراد راس نے کہاکہ اگلے ایک مہینے کے دوران ٹیکنالوجی کی مدد سے اساتذہ کے لئے مزید آسانیاں پیدا کرنے جا رہے ہیں، اساتذہ کو مزید فراہم کی جانے والی آن لائن سہولیات کا اعلان جلد کیا جائے گا۔انہوں نے کہا کہ ٹیکنالوجی کے استعمال کی بدولت جو آسانیاں اساتذہ کے لئے موجودہ دور حکومت میں پیدا کی گئیں ہیں ان کی ماضی میں کوئی مثال نہیں ملتی ۔صوبائی وزیر تعلیم نے کہا کہ ٹیکنالوجی کا بھرپور اور جامع استعمال شفافیت کو بڑے پیمانے پر یقینی بناتا ہے۔
