لاہور، 3جون (اے پی پی ): صوبائی وزیر صنعت و تجارت میاں اسلم اقبال نے کہا ہے کہ وزیراعظم عمران خان نے قومی معیشت کو درست سمت پر ڈال دیا ہے،معاشی ترقی کی چارفیصد شرح مخالفین کے لئے ڈراؤنا خواب بن گئی ہے، بہتر ہوتی ہوئی معشیت سے انتشار کی شکاراپوزیشن کو اپنی سیاسی دکان بند ہوتی نظر آرہی ہے۔
ان خیالات کا اظہار انہوں نے یونین کونسل 86خلیفہ چوک میں عوامی اجتماع سے خطاب کرتے ہوئے کیا ۔انہوں نے کہا کہ مخالفین شور مچاتے رہیں، ہم عوام کی خدمت کرتے رہیں گے، نمائشی منصوبوں کی بجائے مفاد عامہ کی حقیقی سکیمیں لارہے ہیں، سڑکوں کے ساتھ تعلیم اور صحت کے ادارے بھی بنا رہے ہیں ۔
میاں اسلم اقبال کا کہنا تھا کہ تعلیم کو فروغ دئیے بغیر تیز رفتار ترقی کا حصول ممکن نہیں ۔سوڈیوال میں ایک ارب روپے کی لاگت سے سٹیٹ آف دی آرٹ گرلز ڈگری کالج بنائیں گے سمن آباد گرلز کالج میں 22کروڑ کی لاگت سے آئی ٹی کا شعبہ قائم کیا جائے۔ گاسمن آباد ڈونگی گراؤنڈ کو ماڈل پارک بنائیں گے ۔
صوبائی وزیر نے کہا کہ عوام کے ٹیکس کا پیسہ عوامی فلاح کے منصوبوں پر ہی خرچ ہو گا، نوجوانوں کو جدید علوم سے آراستہ کر کے بااختیار بنائیں گے۔انہوں نے کہا کہ عوام کی خدمت میرا اوڑھنا بچھونا ہے، آخری سانس تک عوام کی خدمت کرتا رہوں گا جبکہ منتخب نمائندے اور صوبائی وزیر کی حیثیت سے آپ کے مسائل کا حل میری ذمہ داری ہے،میرے دروازے ہمہ وقت عوام کے لئے کھلے ہیں۔
