ملتان، 12جون(اے پی پی ):عیدالاضحیٰ کے موقع پر قربانی کے جانوروں کی آلائشیں ٹھکانے لگانے کے لئے پیشگی منصوبہ بندی شروع کر دی گئی ہے ، ویسٹ منیجمنٹ کمپنی نے عیدالاضحیٰ کے تینوں ایام میں14 ہزار ٹن آلائشیں ٹھکانے لگانے کا ٹارگٹ مقرر کر دیا ہے۔
ایم ڈی ویسٹ منیجمنٹ کمپنی فخرالاسلام ڈوگر کی زیر صدارت گرینڈ صفائی پلان تیار کرنے کے لئے اجلاس ہوا۔ ایم ڈی فخرالاسلام ڈوگر نے کہا کہ عیدالاضحیٰ کسی بھی صفائی کمپنی کے لئے سب سے بڑا ایونٹ ہوتا ہے ، اس سال گزشتہ برسوں سے بھی بہتر انتظامات کئے جائیں گے۔
فخرالاسلام ڈوگر نے کہا عیدالاضحیٰ کے موقع پرآلائشوں کو بروقت ٹھکانے لگانے کے لئے آگاہی مہم شروع کی جائے گی۔ شہریوں سے اپیل کریں گے کہ وہ آلائشیں سڑک پر پھینکنے کی بجائے ہمارے ورکرز کے حوالے کریں ،کمپنی ورکرز اور مشینری ہر گلی،چوک اور چوراہے پر موجود ہوگی۔
ایم ڈی نے کہا کہ کمپنی ورکرز آلائشیں شہریوں کی دہلیز سے اکٹھی کریں گے، عید کے ایام میں شہر میں14 کیمپ لگائے جائیں گے۔جامع مساجد، عید گاہوں اور اہم شاہراہوں کو عرق گلاب اور فینائل سے دھویا جائے گا۔انہوں نے کہا کہ آلائشوں کے کولیکشن پوائنٹس کے لئے چونے کا بھرپور استعمال کیا جائے گا اور گرینڈ صفائی آپریشن کے لئے کرایہ پر مشینری حاصل کی جائے گی، جانوروں کی آلائشوں کو ٹھکانے لگانے کے لئے ماحول دوست اقدامات کئے جائیں گے۔
اجلاس میں کمپنی منیجرز داود مکی،ساجد ریاض، عقیل احمد،کبیرخان، فہیم لودھی اور محمد عمران بھی شریک ہوئے اور ڈپٹی منیجرز انوارالحق،عثمان خورشید اور اسد خورشید بھی شامل ہوئے۔
