اسلام آباد، 24 جون (اے پی پی ): وزیرِ اعظم نے وفاق کی کراچی میں جاری ترقیاتی منصوبوں کی جلد تکمیل اور نئے اعلان شدہ منصوبوں کو جلد شروع کرنے کو حکومت کی اولین ترجیحات میں سے ایک قرار دیتے ہوئے اس امر پر زور دیا کہ موجودہ حکومت کراچی کے لوگوں کے مسائل کے حل کیلئے اقدامات کر رہی ہے۔
ان خیالات کا اظہار وزیرِ اعظم عمران خان نے متحدہ قومی موومنٹ کے اراکینِ پارلیمنٹ سے ملا قات کے دوران کیا ،ملاقات میں وفاقی وزیرِ منصوبہ بندی اسد عمر، رکنِ قومی اسمبلی خالد مقبول صدیقی اور سینیٹر فیصل سبزواری بھی شامل تھے ۔ملاقات میں وزیرِ اعظم کو کراچی میں جاری ترقیاتی منصوبوں پر پیش رفت سے آگاہ کیا گیا۔
وزیرِ اعظم عمران خان نے کہا کہ وفاقی حکومت این ایف سی ایوارڈ کے مطابق فنڈز کی بروقت منتقلی کو یقینی بنا رہی ہے مگر سندھ حکومت کی طرف سے صوبائی فنڈر کی منصفانہ تقسیم بھی ضروری ہے۔
