ملتان،30جون2021 (اے پی پی): ویسٹ منیجمنٹ کمپنی نے عیدالاضحیٰ کے موقع پر آلائشیں اٹھانے کے پلان کی کامیابی کے لئے حکمت عملی طے کر لی ہے۔ ملتان شہر کے 14سیکٹرز میں پارلیمنٹیرین کے مقرر کئے گئے فوکل پرسنز کے ساتھ مشاورت شروع کر دی گئی ہے۔
یم ڈی ویسٹ منیجمنٹ کمپنی فخرالاسلام ڈوگر سے نشتر سیکٹر کے فوکل پرسنز کے وفد نےملاقات کی، پانچ یونین کونسلوں کے فوکل پرسنز ملک معاویہ، سلیم اللہ خان، حسن خان، اشرف ناصر، عاصم کالرو اور اشفاق احمد وفد میں شامل تھے اور ڈپٹی منیجر آپریشنز عثمان خورشید، سیکٹر انچارج اور سپروائزر بھی ملاقات میں موجود تھے۔
ایم ڈی فخرالاسلام ڈوگر نے گفتگو کرتے ہوئے کہا کہ عید پلان کامیاب بنانے کے لئے شہریوں کا تعاون بہت ضروری ہے اور کہا کہ جانور کی قربانی کرنے والے گھروں میں آلائشوں کے لئے خصوصی بیگ فراہم کئے جائیں گےایم ڈی نے کہا کہ ہر یونین کونسل میں لوڈر، ٹرالی، فرنٹ بلیڈ ٹریکٹر، سوزوکی پک اپ، لوڈر رکشے فراہم کئے جائیں گے، شہری جانوروں کی آلائشیں گلی اور سڑک پر پھینکنے کی بجائے کمپنی ورکرز کے حوالے کریں۔
فخرالاسلام ڈوگر نے کہا فوکل پرسنز اپنے علاقوں میں شہریوں کو آلائشیں ٹھکانے لگانے کے حوالے سے آگاہی دینے میں تعاون کریں اور کہا روزانہ ایک سیکٹر کے فوکل پرسنز کے ساتھ ملاقات کرکے انہیں اعتماد میں لیا جائے گا اور کہا ٹوٹ پھوٹ کا شکار کنٹینرز کی مرمت میں تیزی لائی جارہی ہے۔
ایم ڈی فخرالاسلام ڈوگر نے کہا وزیر اعلیٰ سردار عثمان بزدار کی ہدایت پر پنجاب میں”خدمت آپکی دہلیز پر” پروگرام جاری ہے، عید صفائی کو خدمت پروگرام کا حصہ بنایا گیا ہے جسے لاہور سے بھی مانیٹر کیا جائے گا، کمپنی نے عید کے تینوں ایام میں 14ہزار ٹن آلائشیں تلف کرنے کا ٹارگٹ مقرر کیا ہے اور کہا ایم ڈبلیو ایم سی عید الاضحیٰ کے موقع پر صفائی کے حوالے سے مثالی کارکردگی کا مظاہرہ کرے گی۔
