ملتان، یکم جولائی (اے پی پی):ملتان ڈویژن میں 10ویں عوامی ریونیو خدمت کچہری کا انعقاد کیا گیا ،کمشنر جاوید اختر محمود نے تحصیل کونسل ملتان میں منعقدہ ریونیو عوامی خدمت کچہری کا دورہ کیا ۔
اس موقع پر کمشنر ملتان جاوید اختر محمود نے شہریوں کے مسائل سن کر موقع پر حل کے احکامات جاری کیے ۔انہوں نے کہا کہ گزشتہ9 کچہریوں میں 9707درخواستیں وصول،9631 حل کی گئیں ہیں جبکہ 76 درخواستیں عدالتی کیسز،دیگر قانونی پچیدگیوں کی وجہ سے زیر التواء ہیں۔
کمشنر نے کہا کہ وزیراعلیٰ پنجاب کی اوپن ڈور پالیسی وژن کے تحت کام کر رہے ہیں اور عوام کی کچہری میں شرکت کو دیکھ کر بہت خوشی ہوئی ہے، عوام کیلئے فرد ملکیت اور وراثت کے حصول کا عمل سہل بنایا جارہا ہے۔انہوں نے کہا کہ لینڈ ریونیو و دیگر سرکاری واجبات کی ریکوری بہتر کی جارہی ہے، ریونیو معاملات و ریکوری افسران کا بنیادی کام ہے، اس پر توجہ دیں۔
کمشنر جاوید اختر محمود نے کہا کہ افسران عوامی خدمت کے جذبے سے سرشار ہوکر لوگوں کی فلاح و بہبود کے لیے کام کریں ، تمام ریونیو افسران و عملہ صبح 10 تا دوپہر 3 بجے تک تحصیل آفس میں موجود رہیں گے جبکہ ریونیو افسران پورے دن کی سروس ڈیلوری رپورٹ ایڈیشنل کمشنر ریونیو کو جمع کروانے کے پابند ہیں۔
اس موقع پر ڈپٹی کمشنر ملتان علی شہزاد بھی موجود تھے اور قائم مقام ڈی سی طیب خان، اسسٹنٹ کمشنر خواجہ عمیر موجود تھے سب رجسٹرار نوید احمد، کامران بخاری، تحصیلدار،قانونگو، پٹواری عملہ لینڈ ریکارڈ بھی موجود تھے۔
