ملتان، 01 جولائی (اے پی پی): سپورٹس لوورز کے لئے اچھی خبر، حکومت پنجاب نےسپورٹس سے وابستہ نئے ترقیاتی منصوبے شروع کرنے میں خصوصی دلچسپی کا اظہار کیا ہے صوبہ کے تمام اضلاع میں سپورٹس کونسلز کو دوبارہ بحال کرنے پر غور شروع کردیا گیا ہے۔ حکومت کی ہدایت پر سپورٹس پراجیکٹس بارے پیپر ورک کا بھی آغاز کردیا گیا ہے۔ ڈپٹی کمشنر علی شہزاد کی زیر صدارت کھیلوں سے متعلق ترقیاتی منصوبوں بارے جائزہ اجلاس ہوا۔
ڈپٹی کمشنر علی شہزاد نے کہا کہ کھیلوں کے فروغ کے لئے وزیراعظم عمران خان نے خصوصی ہدایات جاری کی ہیں نوجوان نسل کو صحت مند ماحول فراہم کرنے کے لئے سپورٹس کے انفرا سٹرکچر میں اضافہ بہت ضروری ہے۔
علی شہزاد نے کہا کہ ضلع ملتان میں آبادی کے قریب واقع سرکاری اراضی پر سپورٹس کے پراجیکٹ شروع کئے جائیں گے اور کہا کہ سکول اور کالجز کے سپورٹس گراونڈز کو بھی بحال کیا جائے گا اور دیہی علاقوں میں آبادی کے قریب کھیلوں کے میدان قائم کئے جائیں گے۔
علی شہزاد نے کہا کہ ملتان شہر میں تین سکواش کورٹس تعمیر کرنے کے لئے پیپر ورک جلد مکمل کیا جائے، تحصیل شجاع آباد اور جلالپور پیروالا میں سپورٹس گراونڈز کی تعمیر کے لئے جگہ کی نشاندہی کر دی گئی ہے۔ ڈپٹی کمشنر کی سالانہ سپورٹس کلینڈر تشکیل دینے کی ہدایات بھی جاری کرنے کا حکم صادر فرمایا۔
اجلاس میں اے ڈی سیز قمرالزمان قیصرانی، طیب خان،اے سیز خواجہ عمیر اور عدنان بدر بھی شریک ہوئے اور سی ای او ایجوکیشن شمشیر خان اور ڈسٹرکٹ سپورٹس آفیسر عدنان نعیم بھی موجود تھے۔
