اسلام آباد، 5 جولائی(اے پی پی ): وزیر داخلہ شیخ رشید احمد نے کہا ہے کہ پاکستان اور ازبکستان کے درمیان قدیم مذہبی اور ثفافتی تعلقات قائم ہیں، اسلامی رشتے سے جڑے دونوں ملکوں کے درمیان روابط کو مزید مضبوط کرنے کی ضرورت ہے۔
ان خیالات کا اظہار وزیر داخلہ نے ازبکستان کے سفیر اویبک عارف عثمانووسے گفتگو میں کیا، جنہوں نے پیر کو یہاں ان سے کی، ملاقات میں پاکستان – ازبکستان دو طرفہ تعلقات کے فروغ سمیت باہمی دلچسپی کے امور پر بات چیت سمیت پاکستان اورازبکستان کے درمیان ویزا معاہدوں پر پیشرفت کا جائزہ بھی لیا گیا اور دونوں ملکوں کے درمیان تجارت اور سیاحت کے فروغ پر بھی تبادلہ خیال ہوا دونوں ملکوں کے درمیان قانون نافذ کرنے والے اداروں کے درمیان روابط کو بڑھانے پراتفاق کیا گیا۔
وزیر داخلہ نے کہا کہ ازبکستان عظیم اسلامی ورثے کا امین ملک ہے،پاکستان نے ازبکستان کے شہریوں کے لئے ویزا میں خصوصی سہولیات دی ہیں، ازبک شہریوں کو پاکستان آمد کے لئے اب 5 دن کا ٹرانزٹ ویزا بھی جاری کیا جائیگا۔
ازبک سفیر نے کہا کہ لاہوراور تاشقند کے درمیان پی آئی اے کی پرواز دو جولائی سے بحال ہوچکی ہے، ہوائی سفر کی سہولت سے دونوں ملکوں کے درمیان سیاحت اورکاروبار کو فروغ ملے گا۔انہوں نے کہا کہ ویزہ سہولیات کے معاہدے پر عملدآمد سے روابط میں مزیداضافہ ہوگا۔
